Qazaqstanda respýblıkalyq trassalardaǵy qozǵalys shekteýleri endi aýa raıy kúrt nasharlaǵanǵa deıin 3-4 saǵat buryn engizilýi múmkin. Bul tártip úkimet bekitken vedomstvoaralyq ózara is-qımyl josparynda qarastyrylǵan, dep habarlaıdy infohub.kz saıty.
«QazAvtoJol» ulttyq kompanıasynyń túsindirýinshe, jol qyzmetteri oqıǵadan ozyp áreket etýge mindetti: tótenshe jaǵdaı týyndaǵannan keıin emes, ol qozǵalysqa qatysýshylarǵa qaýip tóndirer aldynda.
«Eger „Qazgıdromettiń“ boljamy aýa raıynyń kúrt nasharlaıtynyn kórsetse, qozǵalys shekteýi qolaısyz qubylystar bastalǵanǵa deıin 3-4 saǵat buryn engizilýi múmkin. Bul halyqty aldyn ala eskertýge jáne júrgizýshilerge jaǵdaı kúrt nasharlaǵanǵa deıin jol júrisin aıaqtaýǵa múmkindik beredi», — delingen habarlamada.
«QazAvtoJoldyń» aqparattyq júıeleri Iandeks, 2GIS jáne inDrive platformalarymen biriktirilgen. Respýblıkalyq trassa jabylǵan nemese ashylǵan kezde málimetter avtomatty túrde jańaryp, marshrýt qurý kezinde servısterde eskeriledi.
1403 baılanys ortalyǵy táýlik boıy jumys isteıdi. Kóp kólemdegi ótinishterdi jedel óńdeý úshin jasandy ıntellekt tehnologıalary engizilýde. Jyl basynan beri 1 mln-nan astam ótinish óńdeldi, dep qosty ulttyq kompanıada.