Qazaqstanda bıyl uıymdasqan qylmystyq top múshelerine qatysty 45 qylmystyq is sotqa jiberildi. Bul týraly İshki ister mınıstrligi habarlady, dep jazady infohub.kz saıty.
«Bıyl uıymdasqan qylmystyq top múshelerine qatysty 45 qylmystyq is sotqa jiberildi», — dep málimdedi İİM-de.
Qylmystardyń geografıasy men sıpaty ártúrli bolyp shyqty. Qaraǵandy oblysynda qylmystyq toptar kásiporyndardyń múlkin urlaǵan, Almatyda kólikterdiń VIN-kodtaryn aýystyrǵan, al Qyzylordada kásipkerlerden aqsha bopsalaǵan.
Qaraǵandy oblysynda qylmystyq qaýymdastyqtyń uıymdastyrýshysy men on múshesi taý-ken baıytý kásiporyndarynyń múlkin urlaǵany úshin 13 jylǵa deıin bas bostandyǵynan aıyryldy. Taǵy bir is boıynsha UQT jetekshisi men tórt múshesi on jylǵa deıingi merzimge sottaldy. Olar iri kásiporynnyń múlkin alaıaqtyq sqemalar arqyly urlaǵan.
Almatyda sot UQT-nyń 13 múshesin segiz jylǵa deıingi merzimge sottady. İİM dereginshe, olar kólikterdi zańsyz tirkep, VIN-kodtary men aqparattyq júıelerdegi málimetterdi ózgertip, sondaı-aq kólik satý kezinde satyp alýshylardy aldaǵan.
Vedomstvo keltirgen derekter boıynsha eń uzaq merzimdi Astanada esirtki satýmen aınalysqan toptyń uıymdastyrýshysy aldy — 17 jyl kolonıa. Onyń bes sybaılasy 16 jylǵa deıingi merzimge sottaldy.
Qyzylordada jergilikti krımınalıtettiń segiz ókili júıeli túrde bopsalaǵany, onyń ishinde kásipkerlerden de bopsalaǵany úshin 11 jylǵa deıin bas bostandyǵynan aıyryldy. Tergeý olarǵa UQT-ny basqarýdy jáne onyń qyzmetine qatysýdy da taqty.
Buǵan deıin «Kýrsıv» İİM, UQK jáne Bas prokýratýranyń UQT-ǵa qarsy birlesken operasıasy týraly jazǵan bolatyn. Nátıjesinde eldiń 10 óńirinde 29 adam ustaldy. Olardan 25 birlik qarý, 2 granata jáne 236 birlik oq-dári tárkilendi.
Sonymen qatar QR Bas prokýrory Berik Asylovtyń málimdeýinshe, birinshi jartyjyldyqtyń qorytyndysy boıynsha Qazaqstanda qylmys deńgeıi jalpy alǵanda 11%-ǵa tómendegen.