Aldaǵy úsh kúnde Qazaqstan aýa raıyna soltústik-batys sıklon áser etedi, dep habarlaıdy infohub.kz saıty.
«Qazgıdromet» sınoptıkteriniń eskertýinshe, sýyq aýamen qorektenetin sıklon men aýa massalarynyń soqtyǵysýy respýblıkaǵa naızaǵaıly jańbyr ákeledi. Eldiń soltústiginde jáne ortalyǵynda nóser ásirese qatty bolady, burshaq jaýýy da yqtımal.
Jaýyn-shashynmen qatar aýa temperatýrasynyń birtindep tómendeýi kútiledi. Soltústik óńirlerde kúndiz termometrler +22…+27°S-qa deıin tómendeıdi, al eldiń shyǵysynda ystyq +33…+38°S-tan +27…+32°S-qa deıin basylady.
Eske salaıyq, Qazaqstanda tamyz aıy qarama-qaıshy bolady: ońtústik pen batysta +44°S-qa deıin ystyq kútilse, soltústikte aptap ystyq jańbyrǵa, naızaǵaıǵa, tipti aıazǵa ulasady. Aıdyń ekinshi jáne úshinshi onkúndiginde soltústik aýdandarda túnde temperatýra +3°S-qa deıin tómendep, kúndiz +25…+35°S-qa kóterilýi múmkin. Batysta jáne ońtústikte túnde +17…+27°S-tan +13…+18°S-qa deıin, kúndiz +32…+42°S-tan +25…+35°S-qa deıin bolady.
Buǵan deıin «Kýrsıv» 3 tamyzda Qazaqstanda +40°S-qa deıin ystyq jáne naızaǵaı kútiletinin jazǵan edi.