Қазақстанның барлық автомобиль жолдарын бірінші санатқа көшіру — қымбат әрі тиімділігі аз шаруа. Бұл туралы Орталық коммуникациялар қызметінде өткен брифингте «ҚазАвтоЖол» басшысы Дархан Иманашев журналистердің алдағы жылдары қай трассалар жүргізушілер үшін қолайлырақ болатыны және қандай мерзімде жүзеге асатыны туралы сұрақтарына жауап беріп айтты, деп хабарлайды infohub.kz сайты.
Спикердің айтуынша, учаскені бірінші санатқа көшіру үшін ондағы қозғалыс қарқындылығы тәулігіне 7–8 мың көлік бірлігінен асуы керек. «Барлық автомобиль жолдарын толық көлемде көшіру — біріншіден, өте қымбат шаруа. Екіншіден, тиімділігі аз», — деп қосты ол.
Дегенмен бұл бағытта жұмыс жүріп жатыр. Биыл «Ақтөбе – Қызылорда» автожолын бірінші санатқа көшіру басталады. «Бүгінге дейін ол екі жолақты болатын. Бұл — «Батыс Еуропа — Батыс Қытай» жобасы. Енді біз оны төрт жолақты қозғалысқа көшіріп жатырмыз. «Қарағанды — Жезқазған» жобасы. Бұл автожол 1960 жылдары салынған, екі жолақты. Биыл біз қатарласа тағы екі жолақ салып, одан кейін оны бірінші санаттағы, яғни төрт жолақты жолға көшіреміз. Бұл жұмыс жүріп жатыр», — деп атап өтті «ҚазАвтоЖол» басшысы.
Болашақта қозғалыс қарқындылығының артуына байланысты «Талдықорған — Өскемен» автожолын қарастыру мүмкіндігі бар.
Жеке ұсыныс «халықаралық маңызы бар автомобиль жолы» деген ұғымның өзіне қатысты. «Жұмыс тобы аясында біз «ҚазАвтоЖол» ретінде «халықаралық маңызы бар автомобиль жолы» ұғымына екі жолақ болмайтындай, кемінде үш жолақты қозғалыс салынатындай етіп енгізуді ұсындық. Халықаралық тәжірибеде «үш жолақты қозғалыс» деген ұғым бар. Ол қалай көрінеді? Екі жолақ, ал әр 5 немесе 10 километр сайын қосымша үшінші жолақ. Яғни көліктер шеру болып келе жатады, егер басып озу қажет болса, бір жақ үшін жолақ саны бірден екіге дейін артады. Дәл осылай әр 5–10 километр сайын халық арасында «ирелең» деп аталатын жол жүреді. Осылайша көлік құралдарына басып озуға, қозғалыс қатысушыларын озып кетуге мүмкіндік береміз. Бұл, біріншіден, арзан, екіншіден, жылдам, үшіншіден, тиімдірек. Осы ұсыныстарды да жұмыс тобы аясында ұсынып отырмыз», — деп түйіндеді спикер.