«Qazgıdromet» 17 qyrkúıekke arnalǵan daýyldy eskertý jarıalady: Qazaqstannyń batysyn, soltústigi men shyǵysyn naızaǵaıly jańbyr jaýyp, Shyǵys Qazaqstan oblysynyń taýly aýdandarynda túnde jańbyr men kóktaıǵaq qar jaýýy múmkin. Qalǵan aýmaqta aıtarlyqtaı jaýyn-shashyn kútilmeıdi, dep habarlaıdy infohub.kz saıty.
Keıbir óńirlerde jel 15-20 metrge deıin kúsheıedi. Túrkistan oblysynyń ońtústiginde shańdy daýyl bolýy yqtımal. Túnde jáne tańerteń elimizdiń batysynda, soltústiginde, shyǵysynda jáne ortalyǵynda tuman túsedi.
Jańbyr men naızaǵaı Batys Qazaqstan, Qostanaı, Soltústik Qazaqstan, Shyǵys Qazaqstan, Abaı jáne Mańǵystaý oblystarynda kútiledi.
Qatty jel Aqtóbe, Almaty, Túrkistan, Qyzylorda, Aqmola, Jambyl jáne basqa da oblystarda soǵady. Shymkent pen Túrkistanda soltústik-shyǵys jeldiń ekpini 15-20 metrge jetedi.
Qaraǵandy oblysynda túnde soltústikte jáne shyǵysta topyraq betinde 2 gradýsqa deıin úsik bolady.
Qyzylorda, Túrkistan, Jambyl, Aqtóbe, Almaty oblystarynda jáne Ulytaý oblysynda, sondaı-aq taǵy birneshe óńirdiń jekelegen aýdandarynda tótenshe órt qaýpi saqtalady.
Astana men Almatyda órt qaýpi joǵary bolyp tur, Qonaevta — tótenshe.
Buǵan deıin sınoptıkter Ózbekstannan keletin aýa Qazaqstanǵa jylý ákeletinin aıtqan edi.