Birinshi qazanda Qazaqstannyń alty qalasynda aýa raıy qolaısyz meteorologıalyq jaǵdaı qalyptasady, aýa lastanýy múmkin. Bul týraly «Qazgıdrometke» silteme jasap, infohub.kz saıty habarlady.
Sınoptıkterdiń dereginshe, qolaısyz meteojaǵdaı Atyraý, Aqtóbe jáne Óskemende, al túnde Almaty, Jezqazǵan jáne Balqashta kútiledi.
Qolaısyz meteojaǵdaı jelsiz tynyq aýa raıy, álsiz jel, tuman jáne temperatýralyq ınversıa kezinde qalyptasady. Mundaı aýa raıynda lastaýshy zattar atmosferanyń jerge jaqyn qabatynda jınalyp, aýa sapasyn nasharlatady.
Lastaný deńgeıine jaýyn-shashyn, ylǵaldylyq jáne aýa temperatýrasy da áser etedi. Qolaısyz meteojaǵdaı kezinde tynys alý jáne júrek-qan tamyrlary aýrýy bar adamdar óz sezimin erekshe baqylaýy kerek.
Turǵyndarǵa kóshede, ásirese kólik qozǵalysy qarqyndy joldar men lastaný kózderiniń mańynda az ýaqyt bolýǵa keńes beriledi. Balalar men júkti áıelderge uzaq serýendeýden bas tartqan jón.
Sozylmaly aýrýy jáne alergıasy bar adamdarǵa qajetti dárilerin qasynda ustaýǵa keńes beriledi. Ashyq aýadaǵy sportpen shuǵyldanýdy múmkindiginshe ǵımarat ishine kóshirgen durys.
Buǵan deıin «Kýrsıv» 1 qazanda Qazaqstannyń birqatar óńirinde daýyldy eskertý jarıalanǵanyn jazǵan. Sınoptıkter jańbyr, naızaǵaı, tuman jáne qatty jel kútip otyr, keı jerlerde órt qaýpi joǵary jáne tótenshe deńgeıde saqtalady, dep habarlaıdy «Qazgıdromet».