23 qyrkúıekte Almaty men Qazaqstannyń taǵy 13 qalasynda qolaısyz meteorologıalyq jaǵdaı (QMJ) kútiledi. Bul týraly «Qazgıdromet» habarlady, dep jazady infohub.kz.
Sınoptıkterdiń málimetinshe, QMJ Pavlodar, Petropavl, Kókshetaý, Aqtóbe jáne Almatyda, al túnde Qostanaı, Qaraǵandy, Balqash, Temirtaý, Óskemen, Semeı, Rıdder, Atyraý jáne Astanada boljanady.
Mamandardyń túsindirýinshe, qolaısyz meteojaǵdaı jeldiń tynyshtyǵy, álsiz jel, tuman jáne temperatýralyq ınversıa qosylǵanda paıda bolady. Nátıjesinde lastaýshy zattar atmosferanyń jerge jaqyn qabatynda jınalyp, aýa sapasynyń nasharlaýyna ákelýi múmkin.
Sınoptıkter mundaı kezeńderde densaýlyqqa teris áser etý qaýpi artatynyn, ásirese sozylmaly aýrýy bar adamdar úshin qaýipti ekenin eskertedi.
Aýanyń lastaný deńgeıine jeldiń jyldamdyǵy, jaýyn-shashyn, ylǵaldylyq jáne aýa temperatýrasy áser etedi.
Turǵyndarǵa syrtta, ásirese avtojoldar men basqa da lastaný kózderiniń janynda, az ýaqyt bolý usynylady. Balalar men júkti áıelderge uzaq serýendeýden bas tartý keńes etiledi.
Tynys alý jáne júrek-qan tamyrlary aýrýlary bar adamdarǵa, sondaı-aq alergıasy barlarǵa qajetti dárilerdi ózderimen alyp júrý usynylady. Ashyq aýadaǵy dene belsendiligin shektep, múmkindiginshe jattyǵýlardy jabyq ǵımarattarǵa kóshirý kerek.
Buǵan deıin «Kýrsıv» 23 qyrkúıekte naızaǵaıly jańbyr, tuman, shańdy daýyl jáne jeldiń 20 m/s-qa deıin kúsheıýi kútiletinin jazǵan bolatyn.