Qazaqstannyń úsh iri uıaly baılanys operatory — Beeline, Kcell jáne Tele2 — Qostanaı oblysyndaǵy túzeý mekemeleriniń aýmaǵynda uıaly baılanys sıgnalynyń tym qýatty bolýyna baılanysty ákimshilik jaýapkershilikke tartylyp, aıyppul salyndy, dep habarlaıdy infohub.kz saıty.
Oblys prokýratýrasynyń málimetinshe, tekserýdi prokýrorlar radıojıilik jónindegi mamandarmen jáne kolonıa basshylyǵymen birlesip júrgizgen. Mamandar kolonıalardaǵy uıaly baılanys qýatyn ólshedi. Nátıjeler úsh túzeý mekemesinde de Beeline, Kcell jáne Tele2/Altel sıgnaldarynyń shamadan tys qýatty bolyp, ruqsat etilgen normalardan aıtarlyqtaı asyp ketkenin kórsetti.
Zań boıynsha uıaly baılanys operatorlary óz munaralaryn túrmeler aýmaǵynda baılanys báseńdetiletindeı nemese barynsha azaıtylatyndaı etip ózderi retteýge mindetti. Alaıda kompanıalar bul talapty elemegen. Sońynda prokýratýranyń aralasýynan keıin úsh operator da ákimshilik jaýapkershilikke tartylyp, aıyppul salyndy.
Qadaǵalaý organy mundaı baılanys qoljetimdiligi naqty qylmystarǵa ákep soǵatynyn atap ótti. Kolonıalarda smartfondy erkin paıdalanǵan sottalǵandar birneshe ret anyqtalǵan.
Prokýratýranyń habarlaýynsha, jazasyn ótep jatqandardyń biri kameradan turyp-aq telefon alaıaqtyǵyn jasap, adamdardy 4 mıllıon teńgege aldaǵan. Onyń telefony tárkilenip, jańa qylmysy úshin er adam Qylmystyq kodeks boıynsha jaýap berýge májbúr.
Buǵan deıin «Kýrsıv» elimizde BJZQ atyn paıdalanyp telefon alaıaqtyǵy jıilegenin jazǵan. Alaıaqtar adamdarǵa qor qyzmetkeri retinde habarlasyp, zeınetaqy esebine qosylmaǵan birneshe jyl eńbek ótilin anyqtaǵanyn aıtady. Alaıaqtar BJZQ bólimshesiniń naqty mekenjaıyn atap, elektrondyq kezekti brondaýdy usynady.