Qostanaı oblysy Sarykól aýdanynyń prokýratýrasy aýyr psıhıkalyq aýytqýy bar, kólik júrgizýge tyıym salynǵan 11 jergilikti turǵyndy júrgizýshi kýáliginen aıyrýǵa qol jetkizdi. Tıisti sheshimderdi qadaǵalaý organynyń bastamasymen sot shyǵardy, dep habarlaıdy infohub.kz saıty.
Prokýratýranyń túsindirýinshe, kólik júrgizý ózderi úshin de, ózge jol qozǵalysyna qatysýshylar úshin de qaýipti bolatyn aýyr psıhıkalyq aýytqýy bar 11 júrgizýshi anyqtalǵan.
Aıryqsha mysaldardyń biri: óńir turǵyny qolynda jaramdy júrgizýshi kýáligi bola tura jalpyǵa ortaq joldarǵa únemi shyǵyp júrgen, alaıda er adam shızofrenıamen aýyrady jáne resmı túrde psıhonevrologıalyq esepte tur.
Qadaǵalaý organynda atap ótkendeı, mundaı sharalar qazaqstandyqtardyń quqyǵyn shekteýge emes, eń aldymen yqtımal qaıǵyly jaǵdaılardyń aldyn alýǵa, adamdardyń ómiri men densaýlyǵyn qorǵaýǵa baǵyttalǵan.
«Sarykól aýdanynyń prokýratýrasy joldardaǵy qaýipsizdikke qater tóndirýi múmkin faktorlardy anyqtaý jáne joıý jumysyn jalǵastyrýda», — dedi prokýratýrada.
Buǵan deıin Qazaqstanda 10 myńnan astam adam medısınalyq kórsetilimder boıynsha júrgizýshi kýáliginen aıyrylǵany habarlanǵan.