Қостанай облысында 18 қарашада сағат 10:00-ден бастап республикалық тасжолдардың төрт учаскесінде жазғы шиналармен көлік жүргізуге тыйым салынды. Шектеуге қар, қатты жел және көктайғақ себеп болды, деп хабарлайды infohub.kz сайты.
NUR.KZ-тің «ҚазАвтоЖол»-ға сілтеме жасап хабарлауынша, тыйым мына бағыттарға қатысты. «Астана — Атбасар — Жақсы — Рузаевка — Сарыкөл — Қостанай (айналма жолмен) — Ресей Федерациясының шекарасы» тасжолында шектеу 418-ші мен 539-шы шақырым аралығында (Қарабалық — Қостанай) қолданылады. Осы тасжолда тыйым 555-ші мен 685-ші шақырым аралығында (Тобыл — Сарыкөл) да жүреді.
Сонымен қатар «Қостанай — Әулиекөл — Сурган» тасжолында — 7-ші мен 108-ші шақырым аралығында (Тобыл — Әулиекөл), сондай-ақ «Қостанай — Мамлютка» тасжолында — 250-ші мен 404-ші шақырым аралығында (Ұзынкөл — Тобыл) шектеу енгізілді.
Тыйым жазғы шиналармен жабдықталған көліктің барлық түріне қатысты. Жолдағы ахуал туралы қосымша ақпаратты 1403 тәулік бойы жұмыс істейтін колл-орталық нөмірі арқылы білуге болады.
Бұған дейін «ҚазАвтоЖол» тасжолдардағы көрінудің нашарлауына байланысты жүргізушілерге үндеу жасағаны хабарланған болатын.


