Qostanaı oblysynyń Mendiqara aýdandyq soty zeınetaqy jınaqtarynyń 16 mln teńgeden astam qarajatyn zańsyz aýdarý týraly qylmystyq isti qarady, dep habarlaıdy infohub.kz saıty.
Qostanaı oblysy sottarynyń resmı Telegram-arnasynda jazylǵandaı, sottalýshy úshinshi tulǵalardyń paıdasyna tólem quralyn paıdalanyp, materıaldyq syıaqy úshin aqsha aýdarýdy zańsyz júzege asyrdy dep aıyptaldy. Bul áreket iri mólsherde jasalǵan (Qylmystyq kodekstiń 232-1-babynyń 6-bóligi).
Sot 2025 jyldyń qarashasynan 2026 jyldyń qańtaryna deıingi aralyqta sottalýshy jeke kásipkerdiń medısınalyq qyzmetpen aınalysýǵa qajetti lısenzıasy joqtyǵyn bile tura, bankten túsken biryńǵaı zeınetaqy tólemderine qatysty aqsha operasıalaryn uıymdastyrǵanyn anyqtady.
Zeınetaqy tólemderin alýshylarmen jasalǵan sharttarda kórsetilgen medısınalyq qyzmetter is júzinde kórsetilmegen. Qarajat jeke kásipkerdiń esepshottaryna túsip, keıin tólem quraly arqyly alýshylarǵa nemese olar kórsetken banktik derektemeler boıynsha basqa tulǵalarǵa qaıta aýdarylǵan.
Osylaısha, áıel osyndaı aýdarymdardy jasaǵany úshin materıaldyq syıaqy alǵan. Zańsyz aýdarylǵan qarajattyń jalpy somasy 16 mln teńgeden asqan, bul qoıylǵan aıyp pen sot anyqtaǵan mán-jaılarǵa sáıkes iri mólsherge jatady.
Sottalýshy kinásin tolyq moıyndady. Jaza taǵaıyndaý kezinde sot qylmystyq jaýaptylyq pen jazany jeńildetetin mán-jaılar retinde kináni tolyq moıyndaýdy, jasaǵan áreketine shyn júrekten ókinýdi, kámeletke tolmaǵan balalarynyń bolýyn jáne óz erkimen kelip moıyndaýyn eskerdi. İs boıynsha aýyrlatatyn mán-jaılar anyqtalmaǵan.
Sottalýshynyń jeke basyn, is boıynsha barlyq mán-jaılardy, sondaı-aq Qylmystyq kodekstiń 55-babynyń 2-bóliginiń talaptaryn eskere otyryp, sot áıelge 2 jylǵa bas bostandyǵyn shekteý jazasyn taǵaıyndady. Kámeletke tolmaǵan balalarynyń bolýyna baılanysty jáne Qylmystyq kodekstiń 74-babynyń 1-bóliginiń negizinde jazany óteý 5 jylǵa keıinge qaldyryldy.
Sondaı-aq sottalǵan áıelden memleket kirisine zańsyz alynǵan tabys retinde 16 432 000 teńge óndirildi. Úkim zańdy kúshine engen joq.