Bir kúni alys sapardan sharshap, boldyryp kele jatqan túlki jol jaǵasynda jortaqtap júrgen qoıandy kóripti. Sonan soń túlki aýyrǵan bolyp, qoıannyń jolyna sulaı ketedi de ony qasyna shaqyrady.
– Qoıanjan-aý, qoıanjan! Nege sonsha jortasyń? Menen nege qorqasyń? Bala jastan birge ósken, toǵaıdyń dámin bir jesken kórshi emes pe edik. Men aýyryp jatyrmyn, halimdi nege suramaısyń? Jaqynyraq kelshi, qoshtasalyq eń bolmasa, – depti qylymsyp.
Sonda qoıan:
– Eki qulaǵym sózińde, eki kózim ózińde. Seni jurt etti jaqsy kóredi deıdi ǵoı, sol ras pa? – dep suraıdy.
– Ol ras, jalǵany joq, – deıdi, túlki kinásin moıyndaǵandaı bolyp. – Tipti et jemesem, basym aýyrady. Ol ádet edi, endi qaıtalana qoımas.
– Mine, men sol ádetińnen shoshımyn.
– Iá, soǵan ózim de qynjylyp jatyrmyn. Keshe bir taýyq jep edim, keıin onyń jastyǵyna janym ashyp, jylap ta jiberdim. Óıtkeni onyń da myna dúnıede tiri júrgisi keledi ǵoı. O, shirkin, tirshilik-aı – dep, kúrsinipti túlki.
Qoıan qıastanyp:
– Sen ony óltirmeı turyp nege oılamadyń? – dep surapty.
Sonda túlki:
– Men dál sol jerde oılaýdy umytyp ketippin. Qazir janyma batyp, aýyryp jatqanym da sonyń ókinishi, – depti yńqyldap.
– Umytshaqtyq degen jaman ǵoı, men de sol umytshaqtyqtan qorqamyn. Sondyqtan da eshkimge jolamaı jortamyn, – dep, qoıan óz betimen kete barypty.