Ormanda túlki men qoıan ómir súripti. Túlkiniń úıshigi muzdan, al qoıannyń úıi aǵashtan bolypty. Kóktem kelip, kún jylynǵanda túlkiniń úıshigi, árıne birden erip ketti.
Boıy muzdaǵan túlki qoıanǵa keledi.
— Qoıan, qoıan! Meni kirgizshi, jylynyp alaıyn!
Jylpos túlki osylaı aldap-sýlap, ańqaý qoıannyń úıshigine kirip alyp, aqyry ony úıinen qýyp shyǵady.
Qoıan jylap kele jatyp, ıtterge kezigedi.
— Qoıan, qoıan! Ne boldy saǵan? Sonshalyqty qamyǵyp ketipsiń ǵoı?
— Qalaı jylamaımyn? Túlkiniń muz úıi erip ketip, meniń jyly aǵash úıimdi tartyp aldy. Endi mine, baspanasyz tentirep júrgenim...
— Jylama! Biz ol ońbaǵandy qazir-aq qýyp shyǵamyz.
Itter jınalyp, qoıannyń úıine keledi.
— Af, af, af! Áı, túlki, shyq qane! Bosat, qoıannyń baspanasyn!
— Aha! Shyqsam shyǵaıyn! Biraq, men dalaǵa shyqsam, senderge jaqsy bolmaıdy ǵoı! Barlyǵyńdy byt-shyt qylamyn! — dedi túlki qorqytyp. Itterdiń úreıi ushyp ketti. Basy amanda qashyp qutylýdy oılap, taıyp turady. «Úıi joqtyń — kúıi joq» degen. Qoıan qańǵı-qańǵı sharshap, taǵyda jylaı bastaıdy. Aldynan aıý shyǵady.
— Qoıan-aý, ne boldy. Sonsha nege jylaısyń?
— Jylamaǵan da qaıtemin? Túlkiniń muz úıi erip ketip, meniń jyly aǵash úıimdi tartyp aldy.
— Jylama! Men ony qýyp shyǵamyn.
— Jo-oq! Qýyp shyǵa almaısyń. Itterde qýyp shyǵa almady.
— Kóresiń, qýyp shyǵamyn.
— Aıý úıshiktiń aldyna kelip:
— Túlki, shyq! Bosat qoıannyń úıin! — dep aqyrady.
— Túlki bolsa pesh ústinen:
— Shyqpaımyn. Shyqsam saǵan jaman bolady. Byt-shytyńdy shyǵaramyn! — dep qorqytty. Aıýdyń úreıi ushyp ketti. Basy amanda qashyp qutylýdy oılady.
Amaly quryǵan qoıan taǵyda jylaı bastady. Qarasa, janynan altyn aıdarly átesh ótip barady. Qolynda kúmisteı jarqyraǵan shalǵysy bar.
— Qoıan, qoıan! Nege jylap otyrsyń? — dep surady.
— Jylamaı qaıteıin? Túlkiniń muz úıi erip ketip, meniń jyly aǵash úıimdi tartyp aldy.
— Jylama! Men ony qazir qýyp shyǵamyn!
— Jo-joq! Qýyp shyǵa almaısyń! Itter qýdy, qýa almady. Aıý qýdy, qýa almady. Sende qýa almaısyń!
— Júr, kórersiń! Qýamyn!
— Ekeýi úıshik janyna keldi. Átesh qatty daýystap óleń aıta bastady.
— Shóp shabamyn, shóp shabamyn! Túlkini izdep tabamyn. Qoıannyń úıinen shyqpasa, ony da shalǵynsha shabamyn!
Túlki qorqyp ketip: Kıinip jatyrmyn, — deıdi.
— Shóp shabamyn, shabamyn! Túlkini izdep tabamyn. Qoıan úıinen shyqpasa, ony da shalǵynsha shabamyn! — dep átesh qaıta ándete bastaıdy.
Túlki sasqalaqtap: «Qazir — qazir, tonymdy kıip jatyrmyn!» — deıdi.
Átesh ánin úshinshi ret qaıtalaı bastaıdy. Túlkiniń záresi ushyp ketedi.
Aman — saýynda zyta jóneledi. Sóıtip, qoıan erjúrek áteshtiń kómegimen qaıtadan óz úıinde tura bastaıdy.