Bir baǵylandy soıǵyzyp,
İrgege jastyq qoıǵyzyp,
Úıine bolys kep otyr.
Kuıryqqa baýyrdy astarlap,
Pys-pys etip qos qoldap,
Sylqyldatyp jep otyr.
Qasyndaǵy hatshysy,
Alańǵasar atshysy -
Olar da asap jatyr-aý.
Poshtabaıyń - paqyryń,
(Asasańshy aqyryn!)
Qaqaldyń ǵoı, batyr-aý!
Báıbishe men baı da toq,
Qonaqtan kútip paıda joq.
Óz tabaǵy ózinde...
Bir bala otyr anadaı,
Beti-qoly qara maı,
Kezi bolys kózinde.
Katqan tońy qaýdyrap,
Tabaqqa kózi jaýdyrap,
Otyr bala esikte.
Aýzy tolǵan túkirik,
«Ket!»- dep qoıady jekirip
Qatar turǵan kúshikke.
Bir mezgilde hatshy Ivan,
Bir jilik ap atshydan,
Esikke qaraı laqtyrdy.
Jilik jerge jalp berdi,
Jalp bergende, tap berdi,
Tap bergende, shap berdi.
He kútip bolar kúshikten?
Tisteı salyp, esikten
Syp etip shyqty dalaǵa.
Kúshikke qaınap zyǵyry,
Artynan shyqty júgire
İle-shala balada.
Qoıshy da bolsa bala edi...
Balany ne dep bolady?!
Kóńiline qatty alǵany.
Shynymen kózge jas alyp,
Úıdi baryp tasalap,
Kúshikti teýip qalǵany.
Úıde otyrǵan báıbishe:
«A, júgirmek, qoı dese!..»-
Dep balaǵa jekirdi.
Sonda bolys yńq etip,
Úıdiń ishin múńkitip,
«Óh!» dep bir kekirdi.

---