2025 jyldyń qyrkúıeginen bastap mobıldi aýdarymdar salyq organdarynyń baqylaýyna iligedi. Bul týraly Qarjy vıse-mınıstri Erjan Birjanov Májilis kýlýarynda málimdedi.
«Zań qabyldandy, endi ol 60 kún ishinde kúshine enedi. Soǵan sáıkes normatıvtik qujattardy bekitemiz de, jumysqa kirisemiz», – dedi ol.
Vıse-mınıstrdiń aıtýynsha, salyq qyzmeti tek naqty krıterılerge sáıkes keletin aýdarymdardy tekseredi:
1. Bir adamǵa 100-den astam túrli tulǵa aqsha aýdarady;
2. Bul aýdarymdar úsh aı qatarynan jalǵasady;
3. Jalpy soma 1 mıllıon teńgeden asady.
Birjanov atap ótkendeı, týystar arasyndaǵy aýdarymdarǵa – tipti 1-2 mıllıon teńge bolsa da – salyq tarapynan eshqandaı suraq qoıylmaıdy.