15 qyrkúıekten bastap Qytaı Halyq Respýblıkasynda kirý jáne shyǵý erejeleri jańartyldy. Vıza rásimdeý kezinde nemese shekara baqylaýynda jalǵan málimet bergen shetel azamattaryna QHR-ǵa bes jylǵa deıin kirýge tyıym salynýy múmkin, dep habarlaıdy infohub.kz saıty.
Jańa tártip qujattardy tekserý tártibin ózgertti. Sonyń saldarynan ımıgrasıalyq baqylaýdan ótý burynǵydan uzaǵyraq ýaqyt alýy múmkin.
Qytaıǵa baratyn nemese odan ushatyn Qazaqstan azamattaryna saparǵa qajetti barlyq qujattyń, sonyń ishinde pasporttyń bar-joǵyn jáne durystyǵyn aldyn ala tekserý usynylady. Sondaı-aq QHR-ǵa kirý men shyǵýdyń ózekti talaptaryn aldyn ala bilip alǵan jón.
«Áýejaıǵa ushýǵa keminde 3 saǵat buryn kelýdi usynamyz, pasport jáne ımıgrasıalyq baqylaýdan ótýge qosymsha ýaqyt qarastyryńyz», — dedi FlyArystan áýekompanıasy.
Áýetasymaldaýshy shekteýlerge qaramastan Qazaqstan men Qytaı arasyndaǵy vızasyz rejım áli de kúshinde ekenin eske saldy. Qazaqstan Respýblıkasynyń azamattary bir saparda Podnebesnaıada 30 kúnge deıin vızasyz júre alady.
Buǵan deıin «Kýrsıv» Qazaqstan Kólik mınıstrliginiń Azamattyq avıasıa komıteti men Qytaıdyń Azamattyq avıasıa ákimshiligi (CAAC) arasynda áýe tasymaly salasyndaǵy yntymaqtastyqty keńeıtý týraly kelissózder Pekınde ótkenin jazǵan bolatyn.