Qytaıda 35 jastaǵy er adam zár shyǵarý kezindegi aýyrsyný men zárde qan bolýyna shaǵymdanyp, aýrýhanaǵa júgindi. Dárigerler onyń denesinen birneshe metal bógde zattardy tapty, dep habarlaıdy infohub.kz saıty.
Zár shyǵarý máselesinen bólek, naýqas ózin jalpy jaǵdaıda qalypty sezingen — basqa shaǵym bolmaǵan. Alaıda tekserý barysynda dárigerler júrek tusynan ádetten tys kóleńkeni baıqady.
Kontrastty kompúterlik tomografıa er adamnyń denesiniń ártúrli bólikterinde ınege uqsaıtyn kóptegen metal zattar bar ekenin kórsetti. Olar júrek tusynan, qursaq qabyrǵasynan, jambastan, qýyqtan jáne jynys múshesinen tabyldy.
Júrek ÝDZ-i uzyndyǵy shamamen 3,6 sm bolatyn ınelerdiń bireýi sol jaq qarynshanyń qabyrǵasyna enip, onyń qýysyna shyǵyp turǵanyn anyqtady. Ol júrek bulshyqetin zaqymdaýy nemese basqa asqynýlarǵa ákelýi múmkin edi. Sondyqtan hırýrgtar aldymen dál sol ıneni alyp tastaýdy sheshti.
Ota barysynda dárigerler tutas qara metal tigin ıneni alyp shyqty. Ol korozıa izderimen qaptalǵan, bul onyń organızmde uzaq ýaqyt bolǵanyn kórsetti. Sonymen qatar naýqastyń keýdesinde ıneniń qalaı kirgenin túsindirerlikteı kórinetin tyrtyq bolmaǵan.
Otadan keıin júrektiń qyzmeti ýaqytsha nasharlady. Jetinshi kúni dárigerler sol jaq qarynshanyń tóbesiniń shyǵyp turǵanyn jáne tromb bolýy múmkin túzilisti anyqtady.
Er adam otadan keıingi toǵyzynshy kúni shyǵaryldy. Toǵyz aıdan keıin onyń jaǵdaıy turaqty bolyp, júrek qyzmeti qalpyna keldi.
Qalǵan bógde zattardy dárigerler ázirge alyp tastamaýdy sheshti, óıtkeni ota ózi ulpalardy zaqymdap, basqa asqynýlarǵa ákelýi múmkin edi. Onyń ornyna naýqasty baqylaýdy jalǵastyrdy.
Dárigerler bolǵan jaǵdaıdyń naqty sebebin anyqtaı almady. Er adam bala kezinen ıntellektýaldyq múgedektigi bolǵan, al ózi jáne onyń zańdy ókili bolyp tabylatyn ákesi naýqastyń denesine ınelerdiń qaıdan kelgenin túsindire almady.
Eki jyl buryn basqa aýrýhanada er adamnyń qursaq aımaǵynan eki bógde zat alynǵan bolatyn. Osy tarıhty eskere otyryp, dárigerler ol zattardy óz betinshe denesine engizýi múmkin dep boljady. Onda adamnyń teri astyna nemese tinderge tereńirek túrli zattardy ádeıi salatyn ózin-ózi zaqymdaýshy minez-qulyqtyń sırek túri bolýy múmkin.
Avtorlar mundaı jaǵdaılardy, ásirese naýqas tolyq medısınalyq tarıhyn bere almaǵan kezde, dıagnostıkalaý óte qıyn ekenin atap ótti. Olardyń aıtýynsha, mundaı jaǵdaılarda vızýalızasıa ádisteri — KT jáne ehokardıografıa mańyzdy ról atqarady.
Buǵan deıin Kursiv Health Shymkenttegi jasóspirimniń asqazanynan kılogrammdyq shash túıinin alyp tastaǵan jaǵdaı týraly jazǵan bolatyn.