Qytaılyq CoolFly startapy tik turyp basqarylatyn erekshe ushý apparaty Urban-dy tanystyrdy. Bul — ázirleýshiler «áýe skeıtbordy» dep ataıtyn bir oryndy elektrlik dron. Global Times málimetinshe, jańa qurylǵyny basqarýdy shamamen 10 mınýtta meńgerýge bolady, dep habarlaıdy infohub.kz.
Urban ádettegi ushaqtarǵa uqsamaıdy: onyń qanattary da, kabınasy da joq. Onyń ornyna apparat dıametri shamamen 3,5 metr dóńgelek platformamen jabdyqtalǵan, onyń ishinde tormen qorǵalǵan tórt jeldetkish jasyrylǵan. Platformanyń ortasynda pılotqa arnalǵan oryn bar.
Qurylǵy boıy 1,9 metrge deıin, salmaǵy 90 kelige deıingi adamǵa eseptelgen. Ushý úshin platformaǵa turyp, ushý túımesin basý jetkilikti, al baǵyt basqarý tutqasy arqyly beriledi. Kompanıa derekteri boıynsha, Urban saǵatyna 70 shaqyrymǵa deıin jyldamdyqqa jete alady jáne áýede shamamen 11 mınýt bola alady. Apparattyń quny shamamen 6,3 mıllıon teńgeden bastalady.
Dronnyń basty ereksheligi — basqarý júıesi. Pılot únemi dene qalpyn ózgertkendikten, aýyrlyq sentri de ózgeredi. Apparat tepe-teńdigin joǵaltpaýy úshin dachıkter pılottyń qalpyn baqylap, jeldetkishterdiń tartý kúshin avtomatty túrde túzetedi. CoolFly munyń gıroskýter prınsıpimen jumys isteıtinin, sondyqtan pılotqa uzaq ýaqyt oqýdyń qajeti joq — apparattyń qozǵalysyna úırený jetkilikti ekenin túsindiredi.
Ázirleýshiler qaýipsizdikke de kóńil bólgen. Urban rezervtik basqarý júıesimen, parashútpen, qaýipsizdik jastyqtarymen jáne jeldetkishterdiń aınalasyndaǵy qorǵanys elementterimen jabdyqtalǵan. Lıdar (jaryq ımpúlstary arqyly obektilerge deıingi qashyqtyqty ólsheıtin tehnologıa) men kameralar aǵashtar men elektr jelileri sıaqty kedergilerdi anyqtaýǵa kómektesedi.
Kompanıa Urban-dy ekstremaldy jaǵdaıda synaqtan ótkizgen: 2026 jyldyń aqpanynda Harbındegi is-sharalar kezinde eki apparat ártisterdi áýege kótergen. Ushýlar shamamen -30 gradýs temperatýrada jáne qatty qar jaýǵan kezde ótken.
Qazir CoolFly dılerlermen kelisim jasap, Qytaıdaǵy týrısik alańdarmen jáne ushý lagerlerimen yntymaqtasyp jatyr. Shetelde Urban-dy jeke ushý apparaty retinde satý josparlanýda.