Qytaıda buryn belgisiz bolǵan ALTNV vırýsy anyqtaldy. Bul vırýs Haemaphysalis longicornis keneleriniń shaǵýy arqyly taralyp, aýyr aýrýlar týdyrady, dep habarlaıdy infohub.kz saıty.
Pekın memlekettik patogender men bıokaýipsizdik negizgi zerthanasynyń ǵalymdary Orthonairovirus tegine jatatyn jańa ALTNV vırýsyn tapty. Bul jańalyq Dabı vırýsyna (DBV) uqsas belgileri bar 3163 naýqasqa júrgizilgen tekserý kezinde ashyldy. Naýqastardyń 10,4% -ynda DBV testiniń nátıjesi teris bolyp shyqty, bul ǵalymdardy qozdyrǵyshty izdeýdi jalǵastyrýǵa ıtermeledi.
Jańa vırýs A tumaýyna uqsas belgilerdi týdyrady: joǵary temperatýra, qatty sharshaý jáne asqazan-ishek joldarynyń buzylýy. Sarapshylardyń alańdaýshylyǵyn týdyratyny — ALTNV vırýsy Dabı vırýsymen birdeı aımaqtarda taralyp, sol azıalyq keneler arqyly juǵady, al Dabı vırýsynyń ólim deńgeıi 30% -ǵa jetedi. Eki vırýspen de juqtyrǵan kezde naýqastarda búırek pen tynys alý joldarynyń aýyr zaqymdanýy baıqalady.
Genetıkalyq testiler ALTNV-diń belgili shtammdardyń mýtasıasy emes, múldem jańa patogen ekenin rastady. Infeksıaǵa qarsy arnaıy em nemese antıbıotıkter áli joq bolǵandyqtan, ǵalymdar dıfferensıaldy dıagnostıkany kúsheıtýdi jáne endemıalyq aımaqtarǵa sapar kezinde saqtyq sharalaryn qoldanýdy suraıdy.