Seýldiń Soltústik okrýgtik soty ýnıversıtet zerthanasyndaǵy jeti áriptesiniń bet-beınesin paıdalanyp, 1100-den astam pornografıalyq dıpfeık jasaǵan 30 jastaǵy qytaılyq aspırantqa qatysty aıyptaý úkimin shyǵardy, dep habarlaıdy infohub.kz saıty.
Jas jigit 1,5 jylǵa bas bostandyǵynan aıyryldy. Naqty merzimnen bólek, sot ony jynystyq qylmys jasaǵan adamdarǵa arnalǵan 40 saǵattyq baǵdarlamadan ótýge mindettep, bes jyl boıy balalar men múgedektigi bar adamdarǵa arnalǵan mekemelerde jumys isteýge tyıym saldy.
Tergeý anyqtaǵandaı, qylmysker ótken jyldyń qarasha aıynan bastap neırojelilerdiń kómegimen kýrstastarynyń bet-beınesin ashyq sýretter men beınejazbalarmen biriktirgen. Sonymen qatar, ol Grok chat-botynyń qorǵanys shekteýlerin aınalyp ótý joldaryn izdegen.
Qylmys sáýirde ashyldy: zardap shekkenderdiń biri kýrstasynyń kompúterinen óz bet-beınesi bar sýretterdi kezdeısoq baıqap qalǵan.
Sot prosesi barysynda aıyptalýshy kinásin moıyndap, ókinish bildirip, sottyń depozıttik shotyna jeti jábirlenýshiniń árqaısysyna 7 mıllıon von kóleminde ótemaqy saldy, alaıda áıelder bul aqshany qabyldaýdan bas tartty.
Sot kináni moıyndaýdy jáne materıaldardyń ınternette taratylmaǵanyn eskerdi, biraq qylmystyń aýyrlyǵy men júıeli sıpaty naqty bas bostandyǵynan aıyrýdy talap etkenin atap ótti.