Threads platformasyndaǵy @Motornyivzgliad atty paıdalanýshy qytaılyq kólikterdiń eki-úsh jyl paıdalaný merzimi bar ıelerine tájirıbelerimen bólisýdi usyndy. Ol mundaı kólikter týraly júrisi bar kólikterge qatysty shynaıy pikirlerdiń az ekenin, al negizgi máseleler kepildik merzimi aıaqtalǵannan keıin bastalatynyn atap ótti, dep habarlaıdy infohub.kz saıty.
Talqylaýǵa qatysýshylardyń kóbi birneshe jyl ishinde eshqandaı kúrdeli aqaý bolmaǵanyn aıtty. Chery krosoveriniń ıesi: «Tiggo 7 Pro-ny 4 jyl ıelendim. Qanaǵattanamyn, osy ýaqyt ishinde esh qıyndyq bolǵan joq, tek shyǵyn materıaldaryn aýystyrdym» dep jazdy. Haval H6 ıesi: «Úsh jyldan beri Haval H6-damyn. Bári keremet» dep qosty. Úsh jastaǵy Changan CS55 Plus pen Zeekr 001 ıeleri de óz kólikterine oń baǵa berdi. Bir paıdalanýshy: «Teris pikirler bolmasa, bári jaqsy» dep túıindedi.
Degenmen, pikir bildirýshiler qytaılyq kólikterdi múldem aqaýsyz dep sanamaıdy. Bir avtomobılshi 80 myń km-den keıin sorǵy isten shyǵýy múmkin ekenin aıtty. Taǵy bireýi ótken jyldardaǵy keıbir modelderdegi aqaýlardy atap ótti: «Elektrıka glúchıt, varıator vstaet — JAC jáne Chery osydan zardap shekti. Chery varıatordyń ornyna «robot» qoıa bastaǵanda — esh problema joq». Kópshiliktiń pikirinshe, basty másele — kepildik aıaqtalǵannan keıingi resýrs: «Eger sáti tússe, kepildik merzimin tynysh óteıdi. Biraq 10 jyldan keıin ne bolady? Sapasyna da, qosalqy bólshekterine de kúmán bar».
Jarıalanym avtory birneshe jyldan keıin qytaılyq kólikterdiń ıeleri aqparattyq keńistikten joǵalady degen boljam aıtty. Alaıda talqylaýǵa qatysýshylar: «Qıaldamańyz, mundaı adamdar óte kóp» dep qarsylyq bildirdi. Basqalary teris jarıalanymdardyń az bolýyn ıeleriniń jaı ǵana júrip, jazýǵa sebep kórmeıtindigimen baılanystyrady. Negizgi daý 10 jyldan keıingi resýrstyń qandaı bolatynyna qatysty boldy. Biraq birjaqty jaýap joq, óıtkeni zamanaýı Haval, Chery, Geely, Changan, Dongfeng jáne Zeekr kópshilik joldarda salystyrmaly túrde jaqynda ǵana paıda boldy.