Qytaılyq ınvestor óz áıeliniń qylmysyn dáleldeý úshin toǵyz jyl jáne kóp qarajat jumsady. Áıeli ony aldap, múlkin ıemdenbek bolǵan. Nátıjesinde, áıel AQSH-ta ustalyp, 65 jyl bas bostandyǵynan aıyryldy, dep habarlaıdy infohub.kz.
South China Morning Post basylymynyń dereginshe, bul oqıǵa 52 jastaǵy Lı Pın esimdi ınvestordyń basynan ótken. Ol bırjada aqsha taýyp, baılar qataryna qosylǵan soń, 2014 jyly bankte qyzmet isteıtin Chjan Shýdanmen tanysqan.
Áıel Lıge óziniń qıyn balalyq shaǵy týraly jáne bilimdi óz kúshimen alǵany jaıly aıtyp, onyń senimine kirgen. Kóp uzamaı ınvestor Chjan jumys isteıtin bankke úlken soma aýdarǵan, sodan keıin olar úılengen. Lı áıeline Shenchjen qalasynan páter satyp alǵan.
Alaıda úılený toıynan keıin kúmándi oqıǵalar bastaldy. Bir kúni Lıdiń kóliginiń tejegishi isten shyǵyp, ol apatqa ushyraýdan aman qalǵan. Kóp uzamaı onyń júkti áıeli kenetten joǵalyp, Los-Andjeleske ushyp ketken.
Keıin belgili bolǵandaı, áıel ózimen birge aqsha men birneshe páterdiń qujattaryn ala ketken.
Tergeý barysynda Chjan men onyń sybaılasy Lıdiń kóliginiń tejegish júıesin ádeıi buzǵany anyqtaldy. Olardyń maqsaty erkekti óltirip, onyń baılyǵyn ıemdený bolǵan. Keıinirek onyń kóterip júrgen balasy Lıden emes ekeni de belgili boldy.
Osydan keıin ınvestor áıelin izdeı bastady. Ol Qytaı men AQSH-ta jeke detektıvter men advokattardy jaldap, áıel týraly aqparat bergen kez kelgen adamǵa bir mıllıon dollar syıaqy usyndy.
2020 jyly Qytaı soty olardyń nekesin jaramsyz dep taýyp, Lıge jyljymaıtyn múlikti qaıtarǵan. Al 2024 jyly Chjan AQSh aýmaǵynda ustalǵan.
Amerıkandyq sot áıeldi alaıaqtyq, adam saýdasy jáne bala urlaý sıaqty birneshe aıyptar boıynsha kináli dep taýyp, ony 65 jyl bas bostandyǵynan aıyrǵan.
Eske sala keteıik, biz Qytaıda eki jasynda joǵalyp ketken qyzdyń 30 jyldan astam ýaqyttan keıin týǵan anasy men ápkesimen qaýyshqany týraly jazǵan bolatynbyz. Tolyǵyraq.