Qyzylorda oblysynda mal sharýashylyǵy salasyndaǵy ınvestısıalyq jobaǵa bólingen búdjet qarajatyn jymqyrý joly anyqtaldy — ondaǵan mıllıon teńge baqylaýdaǵy shottarǵa aýdarylyp, qolma-qol aqshaǵa aınaldyrylǵan, dep habarlaıdy infohub.kz saıty.
Qarjylyq monıtorıń agenttiginiń resmı Telegram-arnasynda málim bolǵandaı, Agenttiktiń Qyzylorda oblysy boıynsha departamenti mal sharýashylyǵy salasyndaǵy ınvestısıalyq jobany júzege asyrýǵa bólingen qarajattyń jymqyrylǵanyn anyqtady.
2021 jyly «Baıqońyr» ÁKK» AQ qatysýymen birlesken kásiporyn — «Syzdyq Ata» JSHS qurylǵan. Jobanyń jalpy quny 311 mln teńgeni qurady. Onyń maqsaty — etti mal sharýashylyǵyn damytý jáne Jańaqorǵan aýdanynyń turǵyndaryn qoljetimdi baǵamen sapaly et ónimimen qamtamasyz etý.
Joba aıasynda korporasıa JSHS-niń jarǵylyq kapıtalyna 151,5 mln teńge saldy. Qarajat 1 600 bas qoı, 130 bas iri qara mal jáne et qaptaýǵa arnalǵan jabdyq satyp alýǵa arnalǵan bolatyn.
«Tergeý derekterine sáıkes, mal satyp alynǵan soń JSHS basshysy qarajattyń bir bóligin shyǵarý sqemasyn uıymdastyrǵan. Barlyǵy 60 mln teńge kúdiktige baǵynyshty «Nuraı» JK jáne «Abylaıhan» JK shottaryna zańsyz aýdarylyp, qolma-qol aqshaǵa aınaldyrylǵan», — dedi vedomstvoda.
Kúdikti qamaýǵa alyndy. Sottyń sanksıasymen oǵan tıesili eki avtokólikke tutqyn salyndy. Qylmystyq is sotqa jiberildi.