Qyzylorda oblysynda derbes derekter jappaı tarap ketti: Shıeli aýdanyndaǵy jeti bilim berý mekemesiniń basshylary memlekettik satyp alý portalyna 529 qyzmetkeriniń qupıa málimetterin jarıalap qoıǵan, dep habarlaıdy infohub.kz saıty.
Qyzylorda oblysynyń prokýratýrasy málim etkendeı, barlyq qupıa aqparat memlekettik satyp alý portalyndaǵy ashyq qujattarǵa jaı ǵana tirkelip qoıylǵan. Buzýshylyqty prokýrorlar baıqap, jaǵdaıǵa aralasqan.
«Atalǵan buzýshylyqtar jeti bilim berý uıymynda anyqtalyp, saldarynan 529 qyzmetkerdiń eńbek quqyqtary buzyldy. Prokýrorlyq qadaǵalaý aktisiniń negizinde derbes derekterdi qamtıtyn málimetterdi memlekettik satyp alý portalynan óshirý boıynsha tıisti sharalar qabyldandy», – delingen habarlamada.
Sonymen qatar derbes derekterdi zańsyz jarıalaýǵa jol bergen bilim berý uıymdarynyń basshylary tártiptik jaýapkershilikke tartyldy.
Prokýratýra Qazaqstan Respýblıkasy zańnamasynyń talaptaryn saqtaýdy baqylaýda ustaıtynyn atap ótti.
Buǵan deıin «Kýrsıv» Qazaqstannyń İshki ister mınıstrligi Ulttyq qaýipsizdik komıtetimen, Bas prokýratýramen jáne Chehıa polısıasymen birlesip, qazaqstandyqtar men TMD azamattarynyń derbes derekterin zańsyz satqan halyqaralyq jelini joıǵanyn jazǵan. Birlesken tintý barysynda jabyq ınternet-resýrs arqyly áreket etken qylmystyq sqemanyń uıymdastyrýshylary ustaldy.
Odan buryn Ulttyq qaýipsizdik komıteti mıkroqarjy uıymdary men kolektorlarǵa qazaqstandyqtardyń jeke derekterin satqan topty ustaǵany habarlanǵan.