Shyǵys Qazaqstan oblysyndaǵy tanymal «Rahman qaınary» kýrortyna aparatyn joldyń jóndelýine narazy týrıser jol jumysshylaryn balaǵattap, olarmen tóbelese bastaǵan. «QazAvtoJol» ulttyq kompanıasy demalysqa shyqqandardy tártipsizdikti toqtatyp, qyzmetkerlerdiń talaptaryn qurmetpen qabyldaýǵa shaqyrdy, dep habarlaıdy infohub.kz.
Óskemen – Altaı – Úlken Naryn – Katonqaraǵaı – Rahman qaınary avtomobıl jolynyń ýchaskesinde aýqymdy jol-qurylys jumystary jalǵasýda. Asfált tóseýge baılanysty munda tańǵy altydan keshki altyǵa deıin ýaqytsha qozǵalys shekteýi engizilgen. Joldyń jabylýy týrıserdiń kýrortqa barýyna kedergi keltiredi: olar uzyn kezekke turyp, demalys aımaǵyna jetý nemese shyǵý úshin «ýaqytsha terezeni» kútýge májbúr.
Jaǵdaıdy jeńildetý úshin saǵat 12:00-den 13:00-ge deıin qosymsha kólik ótkizý uıymdastyryldy. Alaıda sońǵy kúnderi jumys ornynda jekelegen demalysýshylar tarapynan agresıalyq minez-qulyq jıilegen. «Balaǵattaý, qorqytý, jol tehnıkasynyń jumysyna kedergi keltirý, sondaı-aq qozǵalys qaýipsizdigin qamtamasyz etetin qyzmetkerlerge qatysty kúsh qoldaný faktileri tirkeldi», — dep málimdedi ulttyq kompanıada.
«QazAvtoJol» mundaı áreketterge jol berilmeıtinin atap ótti, óıtkeni jumysshylar óz jumysyn qıyn jaǵdaıda atqaryp jatyr, al árbir janjal men ýaqyt rejımin saqtamaý jóndeý jumystarynyń aıaqtalý merzimine tikeleı áser etedi. Sonymen qatar, ulttyq kompanıa zorlyq-zombylyq, qorqytý, balaǵattaý jáne qyzmetkerlerdiń zańdy qyzmetine kedergi keltirý Qazaqstan zańnamasy boıynsha jaýapkershilikke ákep soǵatynyn eske saldy.