Qazaqstandyq «Bıznes po-kazahskı» franshızasynyń juldyzy Ramazan Amantaı gender-patı ótkizip, ekinshi balasynyń jynysyn jarıa etti. Aktórdiń ekinshi qyzy bolatyny belgili boldy, dep habarlaıdy infohub.kz.
«Úsh qyzdyń ákesi jumaqqa kiredi deıdi. Áıelimdi qosqanda, mende úsh qyz bolyp otyr. Qudaı berse, eki uzatý toıy bolady. Sizderge de osyndaı qýanysh buıyrsyn. Qýanyshtan tipti durys vıdeoǵa túse almadyq. Biraq sizdermen qýanyshymyzdy bóliskim keldi», — dedi ol.
Aktórdiń aıtýynsha, olardyń áıelimen birge gender-patı ótkizý tájirıbesi bolmaǵandyqtan, shara túngi ýaqytta ótti. Alǵashqy qyzy dúnıege kelgende olar mundaı kesh uıymdastyrmaǵan.
Aktórdiń jankúıerleri men áriptesteri otbasyn aldaǵy qýanyshpen quttyqtady. «Senderdi qatty jaqsy kóremin. Qyzdar saý jáne aqyldy bolyp óssin», «Qandaı keremet jańalyq», «Quttyqtaımyz!» — dep jazdy olar.