Sheshen Respýblıkasynyń basshysy Ramzan Qadyrov Reseı musylmandarynyń rýhanı jınalysynyń joǵary marapaty – Reseıdiń tuńǵysh múftıi Muhamedjan Husaıynov atyndaǵy I dárejeli ordenmen marapattaldy. Bul týraly uıymnyń baspasóz qyzmeti habarlady, dep jazady infohub.kz.
Reseı musylmandarynyń rýhanı jınalysynyń basshysy, Máskeý múftıi Álbir hazret Qorǵanovtyń aıtýynsha, marapattaý týraly sheshimdi uıymnyń Tóralqasy qabyldaǵan. «Reseı musylmandarynyń rýhanı jınalysy Tóralqasynyń sheshimimen qoǵamdyq dıplomatıany damytýdaǵy erekshe eńbegińiz, dástúrli rýhanı-adamgershilik qundylyqtardy nyǵaıtýdaǵy, dinaralyq beıbitshilik pen kelisimge qol jetkizýdegi aıtarlyqtaı úlesińiz úshin siz (Ramzan Qadyrov – red. esk.) Reseı musylmandarynyń rýhanı jınalysynyń joǵary marapatyna ıe boldyńyz», – dep keltiredi onyń sózderin RBK.
Múftı sondaı-aq Qadyrovty 50 jasqa tolýymen quttyqtap, onyń Sheshenstandy damytýǵa, meshitter men medreseler salýǵa qosqan úlesin, sondaı-aq muqtaj jandarǵa, reseılik áskerı qyzmetshiler men olardyń otbasylaryna kórsetken kómegin atap ótti.
Aıta keteıik, Qadyrovqa berilgen orden tek 2026 jyly – Reseı musylmandarynyń rýhanı jınalysynyń on jyldyǵyna oraı taǵaıyndalǵan. Marapattyń úsh dárejesi bar, onyń ishinde birinshi dárejesi joǵary bolyp sanalady.
Eske salaıyq, qyrkúıekte Ramzan Qadyrov Sheshenstan basshysy saılaýynda jeńiske jetken bolatyn. Ol bul qyzmette 2007 jyldan beri otyr – Reseı óńirleriniń basqa basshylaryna qaraǵanda uzaq ýaqyt. Sondaı-aq jaqynda sheshen kóshbasshysy Reseı armıasynyń general shenin jáne qyzyl beretti aldy.