Qazaqstandaǵy 4,2 myń tozyǵy jetken jáne avarıalyq kóppáterli úıdiń ıelerin qonystandyrýǵa 3,2 trln teńge ınvestısıa qajet ekenin infohub.kz habarlaıdy.
Qurylys mınıstrliginiń Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Qanat Myńbaev Ortalyq komýnıkasıalar qyzmetindegi brıfıńte ákimdikterdiń dereginshe, elimizde 4,2 myń tozyǵy jetken jáne avarıalyq kóppáterli úı bar ekenin aıtty. Olardy renovasıalaý, ıaǵnı páter ıelerin jańa baspanaǵa qonystandyrý úshin 3,2 trln teńge qajet.
Buǵan deıin prezıdent avarıalyq jáne tozyǵy jetken turǵyn úı ıeleriniń 40 myńyn jańa baspanamen qamtamasyz etý mindetin qoıǵan bolatyn. Investor-qurylysshylardy tartý úshin Jer jáne Qurylys kodeksterine, sondaı-aq birqatar zańdarǵa ózgerister engizildi. Olar eski turǵyn úıdi satyp alýdyń ártúrli tetikterin, sonyń ishinde jańa quraldy qarastyrady.
Jańa qural – biryńǵaı operatordyń kepildigi. Ol qurylysshylarǵa úlestik qatysý tetigi arqyly renovasıa júrgizýge múmkindik beredi. Bul rette «Qazaqstan turǵyn úı kompanıasy» (QTÚK) úleskerlerge olardyń baspanasy kez kelgen jaǵdaıda salynyp bitetinine kepildik beredi.
Tozyǵy jetken úılerdiń turǵyndary óz páterlerin «bólmege bólme» qaǵıdaty boıynsha bere alady, al qurylysshylar QTÚK kepildikterin paıdalaný múmkindigine ıe bolady. Bul jaǵdaıda qurylysshy turǵyn úı kompanıasymen kelisimshart jasasyp, menshik ıelerimen kelissóz júrgizedi, olardyń múlikti berýge qoldaryn jınaıdy, kepildik shartyn jasasý úshin QTÚK-ge júginedi, sodan keıin eski turǵyn úıdi buzyp, jańasyn salady.
Qurylys isteri komıteti renovasıa barysy týraly da aıtyp berdi. 2023-2025 jyldar aralyǵynda Qazaqstanda 291 avarıalyq kóppáterli turǵyn úı (KPTÚ) buzylyp, 4 996 menshik ıesi jańa baspana aldy. Osy kezeńde turǵyndardy qonystandyrý úshin 132 jańa úı salyndy.
2023 jyly jospar boıynsha 77 úıdiń 75-i buzylyp, 52 jańa úı salyndy. 1 010 menshik ıesi páter aldy. 2024 jyly jospardaǵy 121 úıdiń 115-i buzylyp, 80 jańa KPTÚ turǵyzylyp, 1 381 menshik ıesi baspanamen qamtamasyz etildi. 2025 jyly jospardaǵy 227 úıdiń 101-i buzyldy, onyń 62-si jeke ınvestorlar esebinen, 39-y jergilikti búdjetter esebinen. Jańa baspana 2 605 menshik ıesine berildi.
2026 jyly bılik 224 avarıalyq kóppáterli úıdi buzýdy josparlap otyr. Qazirgi tańda 44 ǵımarat buzyldy. Menshik ıelerin qonystandyrý jergilikti búdjetter esebinen – ótemaqy tóleý jáne baspanany qaıtalama naryqtan satyp alý arqyly jalǵasýda.
Buǵan deıin habarlanǵandaı, jańa renovasıa baǵdarlamasyna qaramastan, Almatynyń 43 myńnan astam turǵyny eski úılerde turýdy jalǵastyrýda.