Reseıde Qazaqstanda áldeqashan sátti engizilgen ekpe jasaýǵa endi ǵana daıyndyq bastaldy: 2027 jyldan bastap reseılik dárigerler 12–13 jasar qyzdardy adam papıllomavırýsyna — jatyr moıny obyrynyń basty sebebine qarsy jappaı egeı bastaıdy. Bul týraly Interfaks jazyp, infohub.kz saıty habarlaıdy.
Reseı Densaýlyq saqtaý mınıstrliginiń basshysy Mıhaıl Mýrashko aıtýynsha, jasóspirimderge reseılik óndiristegi preparat egiledi. Bul shara áıelder arasyndaǵy ólim-jitimdi kúrt azaıtyp, olardyń reprodýktıvti densaýlyǵyn saqtaýǵa tıis.
Onyń sózinshe, 2027 jyldyń basynan bastap daıyndyq rásimderi júrgiziledi, al jyldyń ekinshi jartysynan bastap 12–13 jasar qyzdardy egýge kirisedi.
«Qalaı bolǵanda da, qazir biz osylaı boljap otyrmyz jáne bul búgingi tańda otandyq ónimmen de qamtamasyz etilgen», – dedi ol «Ana jáne bala» forýmynda.
Basylymnyń málimetinshe, jasóspirimderdi reseılik «Segardeks» preparatymen egý josparlanýda. Ázirleýshi «Nanolek» kompanıasynyń basshysy buǵan deıin vaksına resmı túrde aınalymǵa shyqqanyn habarlaǵan. 30 myń dozadan turatyn alǵashqy legi osy aıdyń sońyna deıin emhanalar men aýrýhanalarǵa jóneltiledi.
Aıta keteıik, Reseıde jatyr moıny obyry 15 pen 44 jas aralyǵyndaǵy reseılik áıelderde anyqtalý jıiligi boıynsha ekinshi orynda tur. Sonymen qatar 44 jasqa deıingi áıelderde obyr aýrýlarynan bolatyn ólimniń basty sebebi — dál osy jatyr moıny obyry.
Qazaqstanda 11–13 jasar qyzdardy egý 2024 jyldyń qyrkúıeginde bastalǵan. Al 2026 jyldyń mamyrynan bastap 14–17 jasar qyzdarǵa da ekpe salyna bastady.
Shildede aıtylǵandaı, qysqa merzimniń ishinde preparattyń birinshi dozasyn 32 myńnan astam jasóspirim alǵan.