Reseıde depressıasy qaıtalanatyn naýqastarǵa kóbirek em-shara taǵaıyndaý múmkindigi paıda boldy: jańartylǵan kómek standartyna elektropýnktýra, mıdy tokpen stımýlásıalaý jáne qandy lazermen sáýlelendirý qosyldy. Densaýlyq saqtaý mınıstrliginiń tıisti buıryǵy jarıalandy, alaıda ol 3 qazanda ǵana kúshine enedi, dep habarlaıdy infohub.kz saıty.
Jańa qujat 2022 jylǵy uqsas buıryqty almastyrady jáne rekýrrentti depressıasy bar eresekterge qatysty bolady. Bul — aýrý jaqsarý kezeńderinen keıin qaıta oralatyn jaǵdaı.
Em-sharalar tizimine óte joǵary jıiliktegi tokpen akýpýnktýra, plazmaferez, qandy últrasúzgileý, jaryq terapıasy jáne gıpoksıalyq áser etý qosyldy. Aıta ketý kerek, bul — múmkin bolatyn ádisterdiń tizimi: naqty adamǵa qaısysy qajet ekenin dáriger anyqtaıdy.
Naýqastardy tekserý tártibi de ózgeredi. Olar gepatıt, AITV jáne merezge tekserilip, ýrologqa qaralýǵa jiberiledi. Sonymen qatar, jańa standart psıhıatrdyń dıspanserlik baqylaýynda bolýdy kózdeıdi.
Elektrlik konvýlsıalyq terapıa da qujatta kórsetilgen. Alaıda bul jańalyq emes: ol transkranıaldy magnıttik stımýlásıa sıaqty burynǵy standartta da bolǵan.
Buǵan deıin «Kýrsıv» amerıkandyq ǵalymdar adamdarǵa depressıalyq kúıden shyǵýdyń nege sonshalyqty qıyn ekenin anyqtaǵanyn jazǵan bolatyn.
Al qarsańynda Definium Therapeutics farmasevtıkalyq kompanıasy LSD negizindegi preparattyń kezekti synaqtaryn aıaqtady. Jańa tez erıtin tabletka jaıylmaly úreı buzylysyn emdeýde joǵary nátıje kórsetti.