2026 jylǵy qańtar-mamyr qorytyndysy boıynsha Qazaqstannyń syrtqy saýda aınalymy 56,3 mlrd dollarǵa jetip, ótken jyldyń osy kezeńimen salystyrǵanda 4,3%-ǵa artty. Qytaı qazaqstandyq ónimniń eń iri satyp alýshysy bolsa, Reseı respýblıkaǵa taýar jetkizýdegi basty seriktes kúıinde qalýda. Bul týraly infohub.kz saıty habarlaıdy.
Aǵymdaǵy jyldyń alǵashqy bes aıynda Qazaqstannyń eksport kólemi 30,36 mlrd dollardy qurap, byltyrǵy jylmen salystyrǵanda 1,6%-ǵa ósti. Import 7,7%-ǵa artyp, 25,99 mlrd dollarǵa jetti. Importtyń qarqyndy ósýine qaramastan, Qazaqstan syrtqy saýdanyń oń saldosyn saqtap qaldy.
Eýrazıalyq ekonomıkalyq odaq (EAEO) elderimen saýda aınalymy 12,47 mlrd dollarǵa jetip, jyldyq kórsetkishte 11,2%-ǵa ósti. Al EAEO-ǵa múshe memleketterge eksport 7,1%-ǵa tómendep, 3,55 mlrd dollardy qurasa, ımport 20,6%-ǵa artyp, 8,92 mlrd dollarǵa jetti. Odaq ishindegi negizgi saýda seriktesi – ózara saýda úlesi 87,3% bolatyn Reseı. Odan keıin Qyrǵyzstan (8,2%), Belarýs (4,1%) jáne Armenıa (0,3%) ornalasqan.
Qazaqstan eksportynyń quramynda shıkizat ústemdik etýde. Kósh basynda – shıki munaı men munaı ónimderi (44,6%), tazartylǵan mys jáne óńdelmegen mys qorytpalary (7,6%), mys kenderi men konsentrattary (5,9%), feroqorytpalar (3%), bıdaı men meslın (2,8%).
Importta eń úlken úlesti jeńil avtomobılder men basqa da motorly kólik quraldary alady (3,1%). Sondaı-aq iri ımporttalatyn taýarlar qatarynda telefon apparattary (2,7%), dári-dármekter (2,5%), munaı gazdary jáne basqa gaz tárizdes kómirsýtekter (2,5%), elektr generatorlyq qondyrǵylar men aınalmaly elektr túrlendirgishteri (2,4%) bar.
Qytaı qazaqstandyq taýarlardyń eń iri ótkizý naryǵy bolyp qalýda, oǵan jalpy eksporttyń 19,9%-y tıesili. Alǵashqy alty satyp alýshy qataryna Italıa (16,4%), Reseı (8,8%), Túrkıa (7,6%), Nıderland (6,3%) jáne Ózbekstan (5,8%) kiredi. Qazaqstanǵa taýar jetkizýdiń basty seriktesi – Reseı, ol jalpy ımporttyń 31,6%-yn qamtamasyz etedi. Odan keıin Qytaı (28,8%), Germanıa (4,9%), AQSh (4,4%), Koreıa Respýblıkasy (2,5%) jáne Túrkıa (2,2%) ornalasqan.
Buǵan deıin Qazaqstannyń sıyr etin basqa elderge shyǵarý kvotasyn uzartatyny belgili boldy. Ekonomıs Rýslan Sultanov Qazaqstannyń saýdada Qytaı men Reseıge táýeldiligi artyp kele jatqanyn málimdedi.