Qazaqstanda robot-kólikterdi engizý boıynsha pılottyq jobanyń qaǵıdalary bekitildi. Inovasıalyq kólikterdi synaqtan ótkizý úsh qalada júrgiziledi, dep habarlaıdy infohub.kz saıty.
Jasandy ıntellekt jáne sıfrlyq damý, kólik jáne ishki ister mınıstrleriniń birlesken buıryǵy 4 tamyzda qol qoıyldy. Qujat elde robot-kólikterdi engizý tártibin aıqyndaıdy jáne olardy praktıkalyq qoldanýdyń quqyqtyq negizin qalyptastyrady.
Jasandy ıntellekt jáne sıfrlyq damý mınıstrliginde túsindirgendeı, qaǵıdalar pılottyq jobaǵa qatysýshylarǵa, kólik quraldaryna, olardy paıdalanýǵa ruqsat berý sharttaryna, sondaı-aq memlekettik baqylaý jáne qaýipsizdikti qamtamasyz etý tetikterine talaptar belgileıdi.
Pılottyq joba Astana, Almaty jáne Qosshy aýmaqtarynda úsh jyl ishinde júzege asyrylady. Avtonomdy kólikterdi synaý mamandandyrylǵan polıgondarda da, ýákiletti memlekettik organdarmen kelisilgen jalpy paıdalanymdaǵy joldardyń belgili bir baǵyttarynda da júrgizilýi josparlanýda.
Jańa qaǵıdalardyń basty erekshelikteriniń biri — ártúrli deńgeıdegi avtomattandyrylǵan kólik quraldaryna qoıylatyn talaptardyń saralanýy. Shartty avtomattandyrylǵan kólikterde kez kelgen ýaqytta basqarýdy qolǵa alýǵa daıyn adamnyń bolýy mindetti. Joǵary avtomattandyrylǵan kólikterde júrgizýshisiz paıdalanýǵa ruqsat etiledi, biraq qashyqtan operatordyń súıemeldeýi uıymdastyrylýy tıis.
Qujat sonymen qatar paıdalaný qaýipsizdigine qoıylatyn mindetti talaptardy belgileıdi. Avtonomdy kólik quraldary derekterdi tirkeý júıelerimen, beınebaqylaýmen, avtomattandyrylǵan basqarý júıesin avarıalyq óshirý quraldarymen, «Avtonomdy basqarý» degen arnaıy belgimen, sondaı-aq baǵdarlamalyq qamtamasyz etýge syrtqy aralasýdan qorǵaý tetikterimen jabdyqtalýy tıis.
Jolaýshylardy tasymaldaý, quqyq qorǵaý organdarymen ózara is-qımyl jáne jol-kólik oqıǵalary kezindegi áreketter máselelerine erekshe nazar aýdarylǵan. Qaǵıdalar taksı qyzmetin kórsetý jáne turaqty emes jolaýshylar tasymaly kezinde avtonomdy kólikterdi paıdalaný tártibin aıqyndaıdy, sondaı-aq pılottyq joba sýbektileriniń jaýapkershiligin saqtandyrý talaptaryn belgileıdi.