Reseıdiń Irkýtsk oblysynda Sibir men Qıyr Shyǵystyń obaǵa qarsy ınstıtýty qyzmetkeriniń resmı dıagnozy jarıalandy. Buǵan deıin BAQ onyń qaıtys bolǵanyn habarlaǵan edi. Rospotrebnadzordyń málimdeýinshe, qyzmetker pnevmonıadan kóz jumǵan, dep jazady infohub.kz saıty.
TASS vedomstvonyń túsiniktemesine silteme jasaı otyryp, marqumda etıologıasy anyqtalmaǵan pnevmonıa anyqtalǵanyn habarlady. Rospotrebnadzordyń naqtylaýynsha, naýqastan alynǵan materıaldy keńeıtilgen zertteý nátıjeleri onyń kásibı qyzmetine qatysty mıkroorganızmderdiń bar ekenin kórsetken joq.
RIA Novostıdiń habarlaýynsha, vedomstvo ınstıtýt qyzmetkerimen baılanysta bolǵan adamdardyń eshqaısysynda ınfeksıaǵa baılanysty jaǵdaı ózgerisi anyqtalmaǵanyn da atap ótti.
«Baılanysta bolǵandardyń eshqaısysynda ınfeksıalyq patologıaǵa baılanysty densaýlyq jaǵdaıynyń ózgerisi anyqtalǵan joq», — delingen habarlamada.
Sonymen qatar ınstıtýtta patogendi mıkroorganızmdermen jumys isteý kezinde apattar tirkelmegeni atap ótildi. Tekserý marqummen baılanysta bolǵan ınstıtýt qyzmetkerlerinde de patologıa tappady.
«COVID-19-dyń eki jaǵdaıy jáne rınovırýstyq ınfeksıanyń eki jaǵdaıy anyqtaldy, basqa ınfeksıalyq aýrýlardyń qozdyrǵyshtary tabylǵan joq», — dep habarlady Rospotrebnadzor.
Eske salaıyq, buǵan deıin BAQ Reseıdiń Irkýtsk oblysynda 27 jastaǵy qyz obaǵa kúdikpen qaıtys bolǵanyn habarlaǵan edi.