Reseıdiń Irkýtsk oblysynda obaǵa qarsy ınstıtýt qyzmetkeriniń qaıtys bolýy týraly aqparat áleýmettik jelilerde keń rezonans týdyrdy. Oba indetiniń órshýi jáne karantın engizilýi múmkin degen qaýesetke Rospotrebnadzor túsinikteme berýge májbúr boldy. Vedomstvo óńir turǵyndaryna oba qaýip tóndirmeıtinin málimdedi, dep habarlaıdy infohub.kz saıty.
Qarsańynda «Lúdı Baıkala» basylymy ınstıtýttyń 28 jastaǵy qyzmetkeri Dará Shıpılova 2 qazanǵa qaraǵan túni Shelehov aýrýhanasynda kóz jumǵanyn habarlaǵan. Basylym jýrnalıs Pavel Stepanovtyń jáne Mash Telegram-arnasynyń nusqasyn keltirdi: 25 qyrkúıekte áıel zerthanada oba qozdyrǵyshy salynǵan probırkany syndyrǵan bolýy múmkin. Alaıda bul nusqa resmı rastaýǵa ıe bolmady.
4 qazanda «Lúdı Baıkala» Irkýtskiniń №1, №3 jáne №10 qalalyq klınıkalyq aýrýhanalarynda, Ivano-Matrenın balalar aýrýhanasynda jáne keminde bir perzenthanada úsh aptalyq karantın engizilgenin habarlady. Jýrnalıserdiń dereginshe, naýqastarǵa kirýge tyıym salynǵan, biraq zattar men azyq-túlik jiberýge ruqsat etilgen.
Basylymnyń derekkózderi shekteýlerdi obaǵa kúdikpen baılanystyrady. Alaıda olardyń aıtýynsha, aýrýhanalarǵa kelip túsetin qujattarda mundaı dıagnoz kórsetilmegen. Jýrnalıser barlyq medısınalyq mekemelerdegi karantındi rastaı almady.
Interfaks agenttiginiń dereginshe, 4 qazanda vedomstvo áıelge sebebi anyqtalmaǵan pnevmonıa dıagnozy qoıylǵanyn habarlady. Keńeıtilgen zertteýler onyń bıomaterıalynan kásibı qyzmetine qatysty mıkroorganızmderdi anyqtaǵan joq.
«Irkýtsk oblysynda, Irkýtsk jáne Shelehov qalalarynda sanıtarlyq-epıdemıologıalyq jaǵdaı turaqty», — dedi Rospotrebnadzordyń baspasóz qyzmeti.
Sońǵy on kúnde basqa qyzmetkerler arasynda juqpaly aýrýlarǵa qatysty ótinish tirkelgen joq.
Naýqaspen baılanysta bolǵandar stasıonarda medısınalyq baqylaýǵa alyndy. Olardyń arasynan COVID-19-dyń eki jaǵdaıy jáne rınovırýstyq ınfeksıanyń eki jaǵdaıy anyqtaldy. Basqa juqpaly aýrýlardyń qozdyrǵyshtary tabylǵan joq, dep jazady «Vedomostı» Rospotrebnadzorǵa silteme jasap.
Buǵan deıin Dúnıejúzilik densaýlyq saqtaý uıymynyń bas dırektory Tedros Gebreıesýs Nú-Iorkte Birikken Ulttar Uıymy Bas Assambleıasynyń otyrysy aıasynda ótken baspasóz konferensıasynda jańa pandemıa sózsiz bolatynyn, bul tek ýaqyt máselesi ekenin málimdedi.