Qazaqstannyń eńbek sińirgen qurylysshysy Nızamhan Sýlaımanovtyń uly Azız Sýlaımanovqa tıesili «RSÝ-1» qurylys kompanıasy 2025 jyldyń qorytyndysy boıynsha 2,3 mlrd teńge paıda tapty. Bir jyl buryn bul kórsetkish 359,6 mln teńge bolǵan, ıaǵnı ósim 6,4 esege jetken. Bul derekter uıymnyń qarjylyq eseptiliginde keltirilgen, dep habarlaıdy infohub.kz saıty.
Satyp alýshylarmen jasalǵan sharttar boıynsha túsim 2025 jyly 3,9 mlrd teńgege jetti, al 2024 jyly 808,1 mln teńge bolǵan — 4,8 esege artqan. 2025 jyldyń sońynda bólinbegen paıda 3,4 mlrd teńgeni qurady.
«RSÝ-1» kompanıasy Shymkenttiń Qarataý aýdanynda tirkelgen jáne qurylys-montaj jumystarymen aınalysady. 2025 jyldyń sońynda jáne jarıalanym daıyndalǵan sátte kompanıanyń jalǵyz ıesi — Azız Sýlaımanov. Sonymen qatar, ol jeke kásipker mártebesine ıe jáne jeke bilim berý mekemelerine jalǵyz ózi ıelik etedi: «İlıas Jansúgirov atyndaǵy jalpy orta mektep» (Shymkent) jáne «Súleıman Ata balabaqshasy» (Shymkent).
Eseptilikte atap ótilgendeı, 2022–2025 jyldary kompanıa turǵyn jáne áleýmettik maqsattaǵy nysandardy, onyń ishinde kóppáterli turǵyn úılerdi, bilim berý jáne qoǵamdyq ınfraqurylym nysandaryn, syrtqy ınjenerlik jeliler men ilespe ınfraqurylymdy saldy. Sonymen qatar, uıym ǵımarattardy kúrdeli jáne aǵymdaǵy jóndeýden ótkizip, aýmaqtardy abattandyrýmen aınalysty.
Ashyq derekkózderde Nızamhan Sýlaımanovtyń eńbek jolyn RSÝ-1-de betonshy bolyp bastaǵany, Samarqand qurylys ınstıtýtyn (Ózbekstan) bitirgen soń RSÝ-1-ge qaıta oralyp, qyzmet baspaldaǵynyń barlyq satysynan ótip, memlekettik uıymnyń basshysy qyzmetine deıin kóterilgeni týraly málimetter bar. RSÝ-1 taratylǵannan keıin ol onyń bazasynda óziniń attas qurylys kompanıasyn qurǵan. Onyń kásiporny Ońtústik Qazaqstan/Túrkistan oblysynda mektepter, balabaqshalar jáne basqa da nysandardy belsendi túrde salǵan. Qazaqstannyń eńbek sińirgen qurylysshysy Nızamhan Sýlaımanov 2020 jyldyń qyrkúıeginde 70 jasqa tolǵan. Qolda bar derekterge qaraǵanda, Azız Nızamhanuly Sýlaımanov kompanıa negizin qalaýshynyń uly.