Qostanaı oblysynda mas kúıde jol-kólik oqıǵasyn jasaǵan júrgizýshi sot aldynda jaýap berdi. Er adam qamaýǵa alynyp, kólik júrgizý quqyǵynan aıyryldy, dep habarlaıdy infohub.kz saıty.
Qostanaı oblysy sottarynyń resmı Telegram-arnasynda jazylǵandaı, Rýdnyı qalasynyń ákimshilik quqyq buzýshylyqtar jónindegi mamandandyrylǵan soty júrgizýshige qatysty isti qarady. Ol mas kúıde kólik basqaryp, múlikke zalal keltirgen jol-kólik oqıǵasyn jasaǵan (Qazaqstan Respýblıkasynyń Ákimshilik quqyq buzýshylyq týraly kodeksiniń 608-babynyń 3-bóligi).
İs materıaldaryna sáıkes, 2026 jyldyń qyrkúıeginde er adam mas kúıde kólik basqaryp, Rýdnyıdaǵy Franko kóshesimen kele jatyp, qala ákimdiginiń turǵyn úı-kommýnaldyq sharýashylyq bólimine tıesili metal jaryq baǵanasyna soǵylǵan. Sonyń saldarynan materıaldyq zalal keltirilgen.
Medısınalyq kýálandyrý qorytyndysy boıynsha, quqyq buzýshylyq jasalǵan sátte júrgizýshi ortasha dárejedegi mas kúıde bolǵan.
Sot otyrysynda er adam ákimshilik quqyq buzýshylyq jasaǵanyn tolyq moıyndady.
Ákimshilik jaza sharasyn belgileý kezinde sot jasalǵan quqyq buzýshylyqtyń sıpaty men qoǵamdyq qaýiptilik dárejesin, kináliniń jeke basyn, sondaı-aq is boıynsha barlyq mán-jaılardy eskerdi. Sot qaýlysymen júrgizýshi kináli dep tanylyp, oǵan 20 táýlik qamaý túrindegi ákimshilik jaza jáne 7 jylǵa kólik júrgizý quqyǵynan aıyrý taǵaıyndaldy.
Qaýly zańdy kúshine engen joq.