Álemdik reıtıńte ekinshi orynda turǵan qazaqstandyq tenısshi Elena Rybakına WTA kóshbasshysy Arına Sobolenkony qýyp jetý múmkindigi týraly pikir bildirdi. Torontodaǵy WTA-1000 serıasyndaǵy bedeldi týrnırdiń shırek fınalyna shyqqannan keıin onyń aıyrmashylyqty tórt upaıǵa deıin qysqartýǵa múmkindigi paıda boldy... dep habarlaıdy infohub.kz.
«Men bul týraly oılamaýǵa tyrysamyn, óıtkeni maǵan áli kóp mach utý kerek», — dep keltiredi Rybakınanyń sózin Punto de Break.
Sportshy qazir ol úshin óz oıynynyń sapasy men shóp kortyndaǵy sátsiz kezeńnen keıingi progres mańyzdyraq ekenin atap ótti. «Men úshin qazir eń bastysy — meniń damýdy jalǵastyryp jatqanymdy kórý», — dedi ol.
Aıyrmashylyqty tórt upaıǵa deıin qysqartý úshin Rybakına týrnırde jeńiske jetýi kerek. Sobolenko Torontodaǵy ónerin tórtinshi raýndta reseılik Ekaterına Aleksandrovadan (19) 6:7 (3:7), 6:4, 4:6 esebimen utylyp aıaqtady. Alaıda belarýstik tenısshiniń 1/8 fınalǵa shyǵýy oǵan jarys aıaqtalǵannan keıin Rybakınanyń nátıjesine qaramastan birinshi oryndy saqtap qalýyna kepildik berdi.
Týrnır bastalar aldynda Sobolenkonyń 8 550 reıtıńtik upaıy bolsa, Rybakınada — 8 056. Qazaqstandyq tenısshi ótken jylǵy kanadalyq «myńdyqtyń» jartylaı fınaly úshin 390 upaıdy qorǵap jatyr.
Keshe Rybakına Torontodaǵy týrnırdiń shırek fınalyna shyǵyp, reseılik Lúdmıla Samsonovany (47) 6:4, 4:6, 6:4 esebimen jeńdi. Sheshýshi partıada qazaqstandyq tenısshi 0:3 esebimen utylyp, eki breık berip qoıǵan edi, alaıda mach barysyn óz paıdasyna shere aldy. Mach 2 saǵat 49 mınýtqa sozyldy.
Shırek fınalda álemniń ekinshi raketkasy tórt dúrkin Úlken shlem týrnırleriniń jeńimpazy Naomı Osakamen (13) kezdesedi. Japonıalyq tenısshi tórtinshi raýndta kanadalyq Leıla Fernandesty (34) 6:4, 6:4 esebimen jeńdi. Rybakına men Osaka úshin bul alǵashqy resmı kezdesý bolady.