2026 jylǵy tenısten AQSh ashyq chempıonatyndaǵy jeńis Elena Rybakınaǵa eki sırek statısıkalyq jetistik ákeldi: Arına Sobolenkomen bolǵan fınaldan keıin qazaqstandyq tenısshi Shteffı Graf pen Vıktorıa Azarenkonyń qataryna qosyldy, dep habarlaıdy infohub.kz saıty.
OptaAce derekkózi atap ótkendeı, Rybakına 1975 jyly Áıelder tenıs qaýymdastyǵy (WTA) reıtıńi engizilgennen beri bir maýsym ishinde «Úlken dýlyǵa» týrnırleriniń fınaldarynda álemniń birinshi raketkasyn eki ret jeńgen ekinshi tenısshi atandy.
Eki jaǵdaıda da qazaqstandyqtyń qarsylasy Sobolenko boldy. Qańtarda Rybakına 2026 jylǵy Avstralıa ashyq chempıonatynyń fınalynda álemniń birinshi raketkasyn 6:4, 4:6, 6:4 esebimen jeńgen edi. Endi ol meıdjordyń sheshýshi machynda — 2026 jylǵy AQSh ashyq chempıonatynda belarýs tenısshisin qaıta jeńdi.
Rybakınaǵa deıin mundaıdy tek 1995 jyly Shteffı Graf qol jetkizgen. «Rolan Garros» týrnırinde nemis sportshysy sol kezde álemdik reıtıńti basqarǵan ıspanıalyq Arancha Sanches Vıkarıony jeńdi. Osy jeńisten keıin Graf ózi birinshi orynǵa qaıta oraldy.
Sol jyly AQSh ashyq chempıonatynda Graf fınalda amerıkalyq Monıka Seleshti jeńdi. Týrǵa oralǵannan keıin Selesh Grafpen birge birinshi raketka mártebesin aldy, sondyqtan Nú-Iorktegi sheshýshi mach ta reıtıńi №1 eki tenısshi arasynda ótti.
Osylaısha, 31 jyldan keıin Rybakına bir kúntizbelik maýsymda «Úlken dýlyǵa» fınalynda reıtıń kóshbasshysyn eki ret jeńgen áıelder týrynyń ekinshi ókili atandy.
Taǵy bir jetistik Rybakınanyń Nú-Iorktegi tıtýlǵa jetý jolyna tikeleı qatysty.
Jartylaı fınalda qazaqstandyq 2023 jylǵy AQSh ashyq chempıonatynyń jeńimpazy Korı Gaýffty — 3:6, 6:4, 6:4 esebimen jeńdi. Fınalda onyń qarsylasy týrnırdiń aldyńǵy eki rozygryshynyń jeńimpazy Sobolenko boldy. Osylaısha, Rybakına bir meıdjordyń burynǵy eki chempıonyn jartylaı fınal men fınal kezeńderinde qatarynan jeńdi.
OptaAce derekteri boıynsha, áıelder jekeleı synynda mundaı 2012 jylǵy Avstralıa ashyq chempıonatynan beri bolmaǵan. Sol kezde Vıktorıa Azarenko jartylaı fınalda týrnırdiń qazirgi chempıony Kım Kleıstersti, al fınalda 2008 jylǵy Avstralıa ashyq chempıonatynyń chempıony Marıa Sharapovany jeńgen bolatyn.
Eske salaıyq, sheshýshi machta Rybakına Sobolenkony úsh sette — 6:4, 5:7, 6:2 esebimen jeńdi. Qazaqstandyq AQSh ashyq chempıonatyn alǵash ret jeńip alyp, mansabyndaǵy úshinshi «Úlken dýlyǵa» tıtýlyna qol jetkizdi — buǵan deıin 2022 jylǵy Ýımbldon men 2026 jylǵy Avstralıa ashyq chempıonatynda top jarǵan.