Sabyrsyz, arsyz, erinshek,
Kórse qyzar, jalmaýyz,
Sorly qazaq sol úshin
Alty baqan alaýyz.
Ózin-ózi kúndeıdi,
Jaqynyn jalǵan mindeıdi,
Ol – arsyzdyq belgisi.
Uıatsynbaı, oılanbaı,
Qoı degenge til almaı,
İs qylmaı ma ol kisi?
Bir-aq sekirip shyǵam dep,
Bir-aq qarǵyp túsem dep,
Mertigedi, jatady.
Urlyqpen mal tabam dep,
Egesse aýyl shabam dep,
Sóıtip qudaı atady.
Bul neń dese bireýge
Joq nárseni shatady.
Qutylam dep isinen,
Bárin kórip kisiden,
Shyǵynǵa ábden batady.
Bul bolmasa onysy,
Aýdarylyp qonysy,
Alystan dám tatady.
Qyzmet qylyp mal tappaı,
Ǵylym oqyp oı tappaı,
Qur úıinde jatady.
El qydyryp as iship,
Erkek aryn satady.
Bala-shaǵa, urǵashy
Úıde jaýrap qatady.

Eńbegi joq, erkesip,
Bir sholaqpen serkesip,
Pysyq degen ant shyqty.
Bir sóz úshin jaý bolyp,
Bir kún úshin dos bolyp,
Júz qubylǵan salt shyqty.
Pysyq kim dep surasań –
Qalaǵa shapsa dem almaı,
Ótirik aryz kóp berse,
Kórgenderden uıalmaı.
Sybyrdan basqa syry joq,
Sharýaǵa qyry joq,
Ótirik, ósek, maqtanǵa
Aǵyp tursa beıne sý.
At-shapannan kem kórmes,
Bireý atyn qoısa «qý».
Qý nápsisin tyıa almaı,
Atym shyǵyp júrsin dep,
Berekege qas bolsa,
Jeliktirgen aıtaqqa
Araq ishpeı mas bolsa.
El tynysh bolsa azady,
Erigip óle jazady.
Úıde otyrsa salbyrap,
Túzge shyqsa albyrap,
Kisini kórse qyljańdap,
Qaljyńshylsyp yrjańdap,
Óz úıinde qıpańdap,
Kisi úıinde kúı tańdap.
Aqyly bar kisini
Ǵaıbattaıdy, dattaıdy.
Aýqaty bar týǵandy
Qaıyrsyz ıt dep jattaıdy.

Mal men baqtyń dushpany,
Keseldi pysyq kóbeıdi,
Kúshik ıtteı úrip júr,
Kisiden kemmin demeıdi.
Qý tilmenen qutyrtyp,
Keter bir kún otyrtyp,
Qyzmet qylǵan kisisin
Qurytýǵa taıaıdy.
Qylyp júrgen óneri:
Hareketi – áreket.
Ózi ońbaǵan anturǵan
Kimge oılaıdy bereket?
Kimdi uıalyp aıaıdy?
Rasy joq sóziniń,
Yrysy joq óziniń,
Óńkeı jalǵan maqtanmen
Shynnyń betin boıaıdy.
Bul sózimde jalǵan joq,
Aıtylmaı sózim qalǵan joq,
Abaılańyz, baıqańyz –
Eldiń jaıy solaı-dy.

---