Sálem sózim alystaǵy elime,
Alystaǵy aq seleýli belime.
Aıdan da aıqyn senderdi izdep qaıtýym
Kúnim bitip, kirgenimshe kórime.
Qar qalanyń tastap qyzyl-jasylyn,
Sardalanyń ańsap jýsan, sasyryn,
Qaıtýym haq bir kún qońyr ińirde
Qar qaladan qashyp shyǵyp jasyryn.
Top izdegen qushyp jolyn Musanyń,
Qushqanym ras Top dep qala qushaǵyn.
Endi qaıtý qur bos aıtý emes qoı,
Qushaǵynda kórdim qandy beıshaǵym.
Túkpir edi turǵan uzaq úı qylyp,
Kóp kitapty kóp tezekteı úıdirip,
Bir shetinen laýyldatyp ot qoıyp,
Ketermin-aý bárin kúl ǵyp kúıdirip.
Kitap kúl bop, óler ottyń jalyny...
Kókti basar qara bulttyń qalyńy...
Tap sol saǵat qulaǵyma kelmeı me
Qońyr jel men sary beldiń zar úni.
Zar ún qoımas janǵa boılap júgirmeı,
Sol ińirde aqyryn sóngen ómirdeı.
Arqamdy ańsap, qar qaladan shyǵarmyn,
Qońyr jyrmen sonaý qońyr ińirdeı.
Men qaıtarmyn bolmaq úshin elmen el,
El bel assa, aspaq úshin birge bel -
Az ǵana eldiń ómiri qurǵyr qaltyldaq,
El sher tartsa, tartpaq úshin birge sher.
Qaıtýym haq, beldi býdym tas qylyp,
«Ket!» deme, elim, endi meni basqa uryp.
Deıtin bolsań: «Qoı jyryńdy, jyraýym
Qobyzymdy qıratarmyn tasqa uryp.
Sózim osy alystaǵy elime,
Alystaǵy aq seleýli belime.
Jatsyń demeı, ózimsiń dep baýryńa al,
Qolyń berip mendeı saıaq serińe.

---