Búgin Samara oblysyndaǵy Ozon logıstıkalyq ortalyǵy ushqyshsyz ushaqtardyń shabýylyna ushyrady. Saldarynan qoımada órt shyqty, dep habarlaıdy infohub.kz saıty.
Ozon kompanıasynyń resmı málimdemesinde aıtylǵandaı, barlyq júıe qalypty rejımde jumys istep, birneshe mınýt ishinde 500-den astam qyzmetker evakýasıalandy. «Degenmen, ókinishke qaraı, zardap shekkender bar. Biz olarǵa barlyq qajetti qoldaýdy mindetti túrde kórsetemiz», — dep atap ótti kompanıada.
Oqıǵa ornynda qutqarý qyzmetteri jumys istep, jedel járdem kólikteri kezekshilik etýde. Qoıma jumysy belgisiz merzimge toqtatyldy. Keltirilgen zalaldyń kólemi baǵalanýda.
Shabýyl týraly aqparatty Ýkraına prezıdenti Vladımır Zelenskı rastap, óziniń Instagram paraqshasynda oqıǵa ornynan beınejazba jarıalady. «Sońǵy 24 saǵatta bizdiń áskerler maıdan shebinen 1000 shaqyrym qashyqtyqta ornalasqan Novokýıbyshev munaı óńdeý zaýytyna soqqy berip, reseı armıasyn mıllıondaǵan dollar eksporttyq kiristen aıyrdy. Sondaı-aq Samara oblysyndaǵy logıstıkalyq ortalyqqa jáne Qara teńizdegi nysandarǵa soqqy jasadyq», — dep jazdy ol.
Eske salaıyq, 18 shildege qaraǵan túni ýkraın ushqyshsyz ushaqtary reseılik Wildberries marketpleısiniń Tambov oblysy men Máskeý túbindegi eki iri logıstıkalyq ortalyǵyna shabýyl jasady. Osydan keıin kompanıanyń Krasnodar jáne Stavropol ólkelerindegi, Sankt-Peterbýrgtegi, Lenıngrad oblysyndaǵy jáne Qyrymdaǵy nysandary da shabýylǵa ushyrady.