Qazaqstanda ózin-ózi jumyspen qamtyǵandardyń quqyqtyq mártebesin ózgertý múmkindigi talqylanýda. Olardy resmı túrde kásipkerlik sýbektilerine jatqyzýy múmkin. Bul másele Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen ótken jańa Salyq kodeksin engizý jónindegi jobalaý keńsesiniń otyrysynda qaraldy, dep habarlaıdy infohub.kz saıty.
Qazir ózin-ózi jumyspen qamtyǵandar kásipkerlik sýbektisi bolyp sanalmaıdy. Alaıda bılik bul máseleni qosymsha zerdeleýdi kózdeıdi, óıtkeni jańa salyq rejımi ondaǵan myń adamdy tartyp úlgerdi. Qoldanystaǵy zańnama boıynsha ózin-ózi jumyspen qamtyǵandar kásipkerler qataryna jatpaıdy, bul Salyq, Kásipkerlik jáne Áleýmettik kodekster arasynda quqyqtyq qaıshylyq týdyrady. Sonymen qatar, shaǵyn jáne orta bıznestiń resmı statısıkasy bul sanattaǵy azamattardy esepke almaıdy.
Jańa Salyq kodeksine sáıkes, arnaıy salyq rejımin jeke kásipker retinde tirkelmegen, ruqsat etilgen qyzmet túrlerimen aınalysatyn, jaldamaly jumys kúshin paıdalanbaıtyn jáne aıyna 300 aılyq eseptik kórsetkishten aspaıtyn tabysy bar jeke tulǵalar paıdalana alady. Rejım aıasynda olar 4% stavka boıynsha tek áleýmettik tólemderdi ǵana tóleıdi.
Memlekettik kirister komıtetiniń dereginshe, jyl basynan beri ózin-ózi jumyspen qamtyǵan retinde 688,8 myń adam tirkelgen. Onyń basym kópshiligi – 597 myńy nemese 87% – «Iandeks», InDrive jáne Wolt sıaqty sıfrlyq platformalar arqyly jumys isteıdi. Taǵy 91,5 myń adam derbes qyzmet atqarady. Jańadan tirkelgenderdiń az ǵana bóligi buryn kásipker bolǵan: 84,2 myńy buryn jeke kásipker mártebesine ıe bolsa, qalǵan 546,4 myń adam buryn kásipker retinde eshqashan tirkelmegen. Osylaısha, jarty mıllıonnan astam qazaqstandyq alǵash ret resmı jumyspen qamtý jáne salyq salý júıesine endi.
Otyrysqa qatysýshylar ózin-ózi jumyspen qamtýdyń ekonomıkalyq qyzmettiń derbes nysanyna, kásipkerlikke ótýdiń aralyq kezeńine nemese jeke jumyspen qamtý sanatyna aınalatynyn anyqtaý kerektigin atap ótti. Qabyldanǵan sheshimge baılanysty Kásipkerlik jáne Áleýmettik kodeksterge ózgerister engiziletin bolady. Talqylaý qorytyndysy boıynsha bılik ázirge bul kodeksterde ózin-ózi jumyspen qamtyǵandardyń mártebesin bekitpeýge sheshim qabyldady. Bul máselege kelesi jyly, jańa salyq rejımin qoldaný tájirıbesi jınaqtalǵan kezde qaıta oralý josparlanýda.