Reseılik «Tatneft» kompanıasy shyǵyp ketkennen keıin «Samuryq-Qazyna» qurylymdarynyń tolyq baqylaýyna ótken «Býtadıen» kompanıasy AIX (Astana International Exchange) bırjasynda oblıgasıalar shyǵarý arqyly 543,5 mln ıýán (shamamen 80 mln dollar) tartpaq. Bul týraly infohub.kz saıty habarlaıdy.
Buǵan ekonomıs ári Finmentor.kz Telegram-arnasynyń avtory Arman Bataev nazar aýdardy.
AIX-te jarıalanǵan málimet boıynsha, kompanıa jyldyq kýpondyq mólsherlemesi 4,5% bolatyn bir jyldyq oblıgasıalar shyǵarady.
Qazirgi ýaqytta kompanıanyń 99,999% úlesi «Samuryq-Qazyna» qorynyń enshiles kásiporny – Samruk-Kazyna Ondeu-ge tıesili. Qalǵan 0,001% SSAP (Stepnogorsk kúkirt qyshqyly zaýyty) ıeliginde. Bul – Samruk-Kazyna Ondeu men «Qazatomónerkásiptiń» birlesken kásiporny.
2026 jylǵy aqpanǵa deıin jobanyń 75% reseılik «Tatneftke» tıesili boldy. Ol jobadan shyqqan soń, «Samuryq-Qazyna» zaýytty óz betinshe salýdy jalǵastyrýda.
«Býtadıen» Atyraý oblysyndaǵy «Ulttyq ındýstrıalyq munaı-hımıalyq tehnopark» arnaıy ekonomıkalyq aımaǵynda quny 1,1 mlrd dollar bolatyn býtadıen óndirý zaýytyn salýda. İske qosylǵannan keıin kásiporyn jylyna 300 myń tonnaǵa deıin ónim shyǵara alady.