«Самұрық-Қазына» ұлттық әл-ауқат қоры жалпы көлемі 1,5 млрд доллар болатын орта мерзімді облигациялық бағдарламаның меморандумын жариялады. Қарыз қаражатын бірнеше сауда алаңынан — Лондон биржасынан (LSE), Гонконг биржасынан (HKEX), сондай-ақ қазақстандық KASE мен AIX-тен тарту жоспарланып отыр, деп хабарлайды infohub.kz сайты.
Облигациялардың нақты шығарылу күні әзірге белгісіз. Бағалы қағаздар сериялармен шығарылады, әр серия бір немесе бірнеше транштан тұруы мүмкін. Бағдарламаның жарияланған шегі — 1,5 млрд доллар, алайда ол кейін ұлғайтылуы ықтимал.
Облигациялардың кірістілігі мен айналым мерзімі әр транш үшін жеке келісіледі. Мөлшерлеме тұрақты, қалқымалы немесе нөлдік болуы мүмкін. Бағалы қағаздардың ең төменгі номиналы 100 еуро, АҚШ инвесторлары үшін — 200 доллар. Шығарылымдарды халықаралық Citigroup Global Markets Limited, Guotai Junan Securities (Hong Kong) Limited және Standard Chartered Bank банктері ұйымдастыруы мүмкін.
Облигациялар шетелде орналастырылған кезде эмитент әр шығарылымның кемінде 30%-ын қазақстандық KASE немесе AIX биржалары арқылы ұсынуға міндетті. Сонымен қатар 21 қазаннан бастап мынадай ереже күшіне енеді: егер шетелдегі орналастыру эмитент үшін неғұрлым тиімді жағдайда жүрсе немесе KASE мен AIX-те сұраныс болмаса, компаниялар Қазақстанда облигация орналастыруға міндетті емес.
Шығарылымдардың өзі әзірге түпкілікті келісілген жоқ. «Самұрық-Қазына» бағдарлама аясында 12 ай ішінде сауда-саттыққа жіберу үшін Лондон және Гонконг биржаларына өтінім берді.
Қарыз алу мақсаттары ретінде портфельдік компанияларды қаржыландыру мен кредиттеу, стратегиялық жобаларды іске асыру және қарызды қайта қаржыландыру көрсетілген. Қор қарыз қаражатын топ ішіндегі қарыздар беруге, мұнай-газ, көлік, энергетика, тау-кен өнеркәсібі және телекоммуникация салаларындағы еншілес және тәуелді кәсіпорындарының ағымдағы қызметі мен инвестициялық бағдарламаларын қаржыландыруға пайдаланады.
Бұған дейін Қазақстанның Даму банкі 2 млрд юаньге (шамамен 300 млн доллар) дейінгі қарыз туралы алдын ала келісім жасасқаны хабарланған. Қаражат Қазақстан экономикасының басым салаларындағы жобаларды кредиттеуге жұмсалады.