Sarǵaıdym kúnnen kúnge qýat kemip,
Qalyń oı - qara jylan júrekti emip.
Aqyryn bitip baram janǵan shamdaı,
Kózime ystyq jastar mólt-mólt kelip.
Apyrm-aı, aýyr boldy-aý kúndi ótkizý,
Ý jutyp, aıdan uzyn túndi ótkizý!-
Qozǵalyp, sóılep, oınap, tiri jatyp,
Ólem dep jas ómirden kúder úzý.
Soǵasyń jıi-jıi, júrek, nege?
Soqqanmen jandana ma solǵan dene?
Sary sý deneni ýlaıd tamyrlarda,
Tazaryp, endi ony qan etem deme.
Qalmady kózdiń nury, kórge aınaldym,
Qarany - aq, aqty - qara derge aınaldym.
Dámadaı pisip turǵan eki betim
Qýaryp, qany qashyp, kúlge aınaldym.
Jaıyldy bar deneme ýy derttiń,
Minekeı, eki aı boldy jalyn juttym.
Kúndiz - Kún, túnde kúmis Aı kórmeımin,
Darıǵa, janym - azat, denem - tutqyn.
Barady kúnnen kúnge azap asyp,
Ólim tur anadaıda qoınyn ashyp,
«Qınala tússin áli!»- degendeı-aq,
Aıaǵyn, kúlimsirep, sanap basyp.
Jasaǵan! Tez alatyn ajal joq pa?
Qınama, tez óleıin, ushyr oqqa.
Shyjyldap dene, shyrqyrap jan bereıin,
Jalyny kókke shyqqan túsir otqa!

---