Maqtanyp sary Shymshyq shalqyp-tasty,
«Teńizdi órteımin!» dep laqap shashty.
Ý-shý bop, bul habardy estigen soń,
Teńizdi tastap, qustar úrkip qashty.
Tań qalyp, «tamashany kóremiz» dep,
Alystan andar keldi ádeıi izdep.
Adam da tús-tus jaqtan kele jatyr
Lek-lek bop, top-tobymen myńdap, júzdep.
Esepsiz teńizge kóp halyq keldi,
Shymshyq «teńiz órteıd!» dep nanyp keldi.
Balyq jep, sorpa iship toıynbaqqa,
Ash penen kóbinese aryq keldi.
«Bir soǵym pulsyz astan» deıtinder de
Qasyǵyn qoldaryna alyp keldi.
Úńilip, sýda bolyp nazarlary,
Syıyp tur jaǵalaýǵa azar bári.
Teńizdi janady dep kim estigen?
Kórmekte sony jurttyń yntyzary.
Sary Shymshyq maqtandy ma, oınady ma,
Kim bilsin, kúıdirem dep oılady ma?
Teńizge ot salǵanmen, jana qoımas,
Deseńshi: «Tym bolmasa, qaınady ma?».
Ol teńiz, kúımek túgil, qaınaǵan joq,
«Jurt nege keldi» dep te oılaǵan joq.
«Qap, bálem, toqtaı tur!» - dep Shymshyq qaıtty,
Teńizge tisin basyp qaıraǵan bop.

* * *
Keıbireý qoldan kelmes isti oılaıdy,
Maqsaty onymenen tus bolmaıdy.
«Uıalǵan tek turmaıdy» degen ras,
«Qap, bálem, toqtaı turmen» jurtty aldaıdy.

---