Sultan Sársemálıevtiń bes kámeletke tolmaǵan balasy ata-ana qamqorlyǵynsyz qaldy. Onyń ákesi búkil otbasyn óltirgeni úshin ómir boıy bas bostandyǵynan aıyryldy. Sot balalardyń taǵdyry týraly jeke qaýly shyǵardy, dep habarlaıdy infohub.kz.
İsti qaraǵan sýdıa Zarema Hamıdýllına sottalýshynyń bes kámeletke tolmaǵan balasynyń taǵdyryna qatysty jeke qaýly shyǵarylǵanyn málimdedi. Sot sheshimine sáıkes, balalardyń quqyǵyn qorǵaý jáne olardy ornalastyrý máseleleri jaýapty organdarǵa júkteldi.
«Sot balalardy kútý jáne ornalastyrý máselesin Atyraý oblysy bilim basqarmasyna tapsyrdy. Sonymen qatar, Qyzylqoǵa aýdanynyń ákimdigine Jangeldın aýylyndaǵy qaza bolǵandardan qalǵan úıdiń muragerlik quqyǵyn resimdeý tapsyryldy», — dedi sýdıa Zarema Hamıdýllına.
Sultan Sársemálıevtiń kenje balasy 2025 jyly dúnıege kelgen. Aǵymdaǵy jyldyń 3 aqpanynda aýdandyq kámeletke tolmaǵandar isteri jáne olardyń quqyǵyn qorǵaý jónindegi komısıa balalardy memleket qamqorlyǵyna berý týraly sheshim qabyldady. Buǵan deıin olardy sottalýshynyń anasy kútip-baqqan. Alǵashynda úsh úlken bala kámeletke tolmaǵandar beıimdeý ortalyǵyna, al eki kishisi balalar úıine jiberilgen. Keıin Atyraýdaǵy beıimdeý ortalyǵynda 3 pen 9 jas aralyǵyndaǵy tórt bala tárbıelenip jatqany, al eń kishkentaı bala mamandandyrylǵan mekemede ekeni anyqtaldy.