Atyraý oblysynda bir otbasynyń tórt múshesin óltirdi dep aıyptalǵan Sultan Sársemálıevtiń isi boıynsha taraptardyń pikirtalasy bastaldy. Memlekettik aıyptaýshy sottan ony kináli dep tanyp, ómir boıy bas bostandyǵynan aıyrý jazasyn taǵaıyndaýdy surady... dep habarlaıdy infohub.kz saıty.
Atyraý oblysynyń qylmystyq ister jónindegi mamandandyrylǵan aýdanaralyq soty rezonansty qylmystyq isti qaraýda. Sársemálıev óziniń burynǵy áıeli Aqbaıan Muqanǵalıevanyń ákesin, anasyn, aǵasyn jáne qaryndasyn óltirdi dep aıyptalýda. Bul qaıǵyly oqıǵa 2025 jyldyń sońynda Jangeldın aýylynda bolǵan.
Sottyq pikirtalas barysynda prokýror aıyptalýshyny Qylmystyq kodekstiń birneshe baby boıynsha kináli dep tanýdy jáne jazany tótenshe qaýipsizdik mekemesinde óteýdi surady.
«Qylmystyq kodekstiń 58-babynyń 4-bóligi negizinde Sársemálıev Sultan Samıgollaulyna túpkilikti jaza retinde ómir boıyna bas bostandyǵynan aıyrý jazasyn taǵaıyndaýdy suraımyn», — dedi memlekettik aıyptaýshy.
Sársemálıevke eki jáne odan da kóp adamdy óltirý, dármensiz kúıdegi adamdy óltirý, asa qatygezdikpen jáne paıdakúnemdik nıetpen óltirý, sondaı-aq tonaý nemese bopsalaýmen ushtasqan qylmys jasaý aıyptary taǵyldy.
Sonymen qatar, ol iri kólemdegi urlyq jáne alaıaqtyq, mal urlyǵy, sondaı-aq qujattardy zańsyz ıelený, jasyrý, joıý nemese búldirý baptary boıynsha jaýapkershilikke tartylýda.
Prokýror sondaı-aq sottan aıyptalýshydan zardap shekkenderdiń paıdasyna 30 aılyq eseptik kórsetkish mólsherinde ótemaqy óndirýdi surady, bul 129 750 teńgeni quraıdy. Sonymen qatar, 2 512 128 teńge kólemindegi prosesýaldyq shyǵyndardy óteýdi jáne bultartpaý sharasy retindegi qamaýda ustaýdy ózgerissiz qaldyrýdy surady.
Memlekettik aıyptaýshy sondaı-aq zardap shekken taraptyń materıaldyq jáne moraldyq zıandy óteý týraly azamattyq talaptaryn qanaǵattandyrýdy surady.
Sultan Sársemálıev Naýryz Muqanǵalıevti qasaqana óltirdi degen aıypty moıyndamaıtynyn málimdedi.
Taraptardyń pikirtalasy aıaqtalǵannan keıin aıyptalýshyǵa sońǵy sóz beriledi. Odan keıin sot úkim shyǵarý úshin keńesý bólmesine ketedi.