Gollıvýd juldyzy Sasha Baron Koen rejıser Kventın Tarantınonyń teatr sahnasyndaǵy tuńǵysh týyndysynda basty róldi somdaıtyn boldy. Ázirge rastalmaǵan aqparatqa qaraǵanda, akter «The Popinjay Cavalier» atty qoıylymda basty keıipkerdiń beınesin jasaıdy, dep habarlaıdy infohub.kz saıty.
Jaqynda ol «Ali G: Who Iz I?» fılminde óziniń burynǵy Steıns qalasynyń buzaqy jigiti beınesine qaıta oralatyn bolady. Alaıda bul joly Sasha Baron Koen úshin jańa baǵyt — teatr sahnasy bolyp otyr.
Deadline basylymynyń málimetinshe, akter Kventın Tarantınonyń «The Popinjay Cavalier» pesasynda basty róldi oınaıdy. Qoıylymdy da Tarantınonyń ózi qoıýǵa nıetti. Shyǵarma 1830 jyldardaǵy Eýropada órbıdi jáne «aldaý men betperdeleýge qurylǵan qyzyqty komedıa» ári «teatr men onyń asqaq romantıkasyn dáripteıtin keń tynysty týyndy» retinde sıpattalyp otyr.
Qoıylymdy Sonia Friedman Productions jáne Sony Pictures Entertainment kompanıalary usynady. Ol naýryz aıynda jarıalanǵan bolatyn, al premerasy 2027 jyldyń basyna josparlanǵan. Qaı Ýest-End teatrynda qoıylatyny ázirge belgisiz.
Qazir Tel-Avıvte turatyn Tarantıno byltyr otbasymen Anglıaǵa kóship, osy pesamen aınalysatynyn aıtqan edi. Onyń aıtýynsha, bul jumys onyń ómiriniń 18-24 aıyn alady.
Shilde aıynda Frıdman Sunday Times basylymyna Tarantınonyń «teatrdy jaqsy biletinin» aıtqan. «Onyń basqa da kóptegen dramatýrgter men rejıserlerde joq ereksheligi — kórermen tájirıbesine degen qyzyǵýshylyǵy. Ol kórermenniń teatrdaǵy eń keremet keshin ótkizgenin qalaıdy», — degen ol.
Sasha Baron Koen teledıdardaǵy Ali G, Borat sekildi tanymal keıipkerlerin úlken ekranǵa shyǵaryp, zor tabysqa jetkenimen, ázirge iri sahnalyq qoıylymda basty ról oınaǵan emes. Ol fransýz kloýn-ustazy Fılıpp Goleniń shákirti bolǵan. Gole bıyl qaıtys bolǵanda, akter Guardian basylymyna bylaı degen: «Eger onymen jolym túspese, men múldem basqa, aqylǵa qonymdy ispen aınalysyp júrer edim. Alaıda men komedıany tańdadym — ol maǵan sengendikten, alǵa jetelegendikten jáne áli kúnge deıin basymdy aýyrtatyn tásilderdi úıretkendikten».
Tarantıno 2012 jyly túsirgen «Django Unchained» vesterninde Baron Koenge shaǵyn ról bergen bolatyn. Alaıda keıin akter bul jobadan bas tartyp, Tom Hýperdiń uzaq jyldar boıy Ýest-Endte qoıylyp kele jatqan múzıklge negizdelgen «Les Misérables» fılmine túskenin aıtqan.
«Ali G: Who Iz I?» fılmi kelesi aıda jaryqqa shyǵady. Baron Koenniń jáne «The Popinjay Cavalier» qoıylymynyń ókilderi habarlasqan kezde akterdiń quramǵa qosylǵanyn rastamady.