Almaty ákimi Darhan Satybaldy jylytý maýsymy qarsańynda qalanyń negizgi jylý berý nysandaryn aralap shyqty. Tekserý barysynda Ońtústik aýdandyq qazandyǵy, «Orbıta» qazandyǵy jáne Áýezov aýdanyndaǵy jylý jelilerin qaıta jańǵyrtý ýchaskesi qaraldy, dep habarlaıdy infohub.kz saıty.
Alǵashqy nysan — Hodjanov kóshesindegi Ońtústik aýdandyq qazandyǵy. Ol 1553 nysandy, onyń ishinde 356 kóppáterli úı men 16 bilim nysanyn jylýmen qamtamasyz etedi. Qaıta jańǵyrtý aıasynda munda úsh qazandyq aýystyrylyp, taǵy bireýi jańartyldy, sondaı-aq qosalqy jabdyqtar jańartyldy. Jobany iske asyrý qazandyqtyń qýatyn 55 Gkal/saǵatqa arttyryp, 200 myńǵa jýyq tutynýshynyń jylýmen qamtamasyz etilý senimdiligin kóteredi.
Sodan keıin Darhan Satybaldy 1973 jyldan beri jumys istep kele jatqan «Orbıta» aýdandyq qazandyǵyn aralady. Nysanǵa 1312 nysan qosylǵan, onyń ishinde 925 kóppáterli úı, 39 bilim nysany jáne 17 densaýlyq saqtaý nysany bar. 2026 jyly munda jóndeý jumystary júrgizildi.
«Basty mindet — eń joǵary júkteme kezeńinde turǵyndardy turaqty jylýmen qamtamasyz etý. Tozý deńgeıi joǵary nysandardy kezeń-kezeńimen jańǵyrtyp, barlyq jumysty sapaly jáne belgilengen merzimde júrgizý qajet», — dedi Darhan Satybaldy.
Aralaýdyń qorytyndy núktesi Saın — Momyshuly — Ýlýgbek — Abaı kósheleriniń kvadratyndaǵy jylý jelilerin qaıta jańǵyrtý ýchaskesi boldy. Jylý trassasy 1988 jyldan beri paıdalanylyp keledi jáne normatıvtik merzimin taýysqan, sońǵy úsh jylda munda 10 zaqymdaný tirkelgen. Qazir nysannyń daıyndyǵy 80%-dy quraıdy, bıyl shamamen 120 metr jylý jelisi aýystyryldy. Qaıta jańǵyrtý aıaqtalǵan soń 45 kóppáterli úıdiń, 15 basqa nysannyń jáne bir balabaqshanyń jylýmen qamtamasyz etilý senimdiligi artady.
Nysanda turǵyndarmen kezdesý de ótti. Qala turǵyndary qalalyq ınfraqurylymǵa qatysty máseleler men usynystaryn jetkizdi. Kezdesý qorytyndysy boıynsha beıindi qyzmetterge tıisti tapsyrmalar berildi.
Jalpy, 2026 jyly Almatyda 20,1 km jylý jelisin qaıta jańǵyrtý jáne jóndeý jumystary júrgizilýde, onyń 15,8 km-i oryndaldy.